Ўзбекистонда 176 минг нафардан ортиқ бола Pfizer/BioNTech вакцинаси билан ихтиёрий равишда эмланди. Бу ҳақда Соғлиқни сақлаш вазирлиги матбуот котиби хабар қилди.
Эслатиб ўтамиз, 2021 йилнинг 28 сентябридан Ўзбекистон бош давлат санитария врачи ва миллий техник иммунологик эксперт комиссиясининг қарорига асосан, мамлакатда ота-оналар ва васийларининг розилиги асосида, ихтиёрий равишда 12 ёшдан катта болаларни Pfizer вакцинаси билан эмлаш йўлга қўйилган.
27 октябрь ҳолатига кўра, мамлакатда 176 791 нафар 12 ёшдан 18 ёшгача бўлган болалар Pfizer вакцинаси билан ихтиёрий равишда эмланган.
Хусусан, болаларни коронавирусга қарши эмлаш жараёни Фарғона (37 395 доза), Наманган (34 479 доза), Андижон (22 502 доза) вилоятларида юқори суръатларда олиб борилмоқда.
Аввалроқ АҚШ томонидан хайрия сифатида Ўзбекистонга юборилган Pfizer/BioNTech вакцинасининг 273 780 дозалик партияси олиб келингани тўғрисида хабар берилганди. Шу кунга қадар мамлакатда ушбу вакцина туридан 2 миллиондан ортиқ доза олиб келинган.
Мавзуга доир: Ўзбекистон ноябрда Россияга COVID-вакцинация сертификатларини ўзаро тан олиш тўғрисидаги ҳужжатни юборади