BMTning Nyu-Yorkdagi bosh qarorgohida tashkilot Bosh Assambleyasining “Iqlim bo‘yicha chora-tadbirlar ko‘rish: odamlar, sayyora va farovonlik uchun” oliy darajadagi yig‘ilishi bo‘lib o‘tdi, deb xabar beradi O‘zbekiston TIV matbuot xizmati.
Tadbirda BMT Bosh kotibi Antoniu Guterrish, BMT Bosh Assambleyasining 76-sessiyasi raisi Abdulla Shahid, 70 dan ortiq davlatlar rahbariyati darajasidagi delegatsiyalar, shuningdek, YuNEP, EKOSOS, YuNISEF, RKIK rahbarlari, fuqarolik jamiyati va yoshlar tashkilotlari vakillari ishtirok etgan.
Forumda O‘zbekistonning BMTdagi doimiy vakili Baxtiyor Ibragimov so‘zga chiqib, Prezident Shavkat Mirziyoyevning iqlim o‘zgarishiga qarshi kurashish, atrof-muhit va bioxilma-xillikni muhofaza qilish borasidagi muhim tashabbuslari haqida ma’lumot bergan.
Ishtirokchilar e’tibori Orol dengizining qurishi natijasida yuzaga kelgan ekologik halokatga ham qaratilgan. Mazkur tabiiy ofatning salbiy oqibatlarini bartaraf etish bo‘yicha O‘zbekiston tomonidan amalga oshirilayotgan keng ko‘lamli chora-tadbirlar ko‘rsatilgan.
Eslatib o‘tamiz, Shavkat Mirziyoyev 21-sentabr kuni BMT Bosh Assambleyasining 76-sessiyasida nutq so‘zlagan edi. Davlat rahbari o‘z nutqida ekologiya borasidagi choralarning mantiqiy davomi sifatida 2022-yili Orolbo‘yi hududida, Nukus shahrida “yashil” energetika bo‘yicha BMT bilan hamkorlikda yuqori darajadagi xalqaro forum o‘tkazish tashabbusi ilgari surilgandi.
Bundan avval AQShdan Orolbo‘yi aholisi uchun gumanitar yordam yuborilgani, Janubiy Koreya Orolbo‘yi mintaqasi bo‘yicha trast fondining moliyaviy donoriga aylangani hamda hukumat qarori bilan Orol dengizi va Orolbo‘yi hududlarida o‘rmonzor barpo etiladigan maydon belgilangani haqida xabar berilgandi.