Энергетика вазирлиги штаби томонидан 1 октябрдан 22 октябрга қадар ўтказилган тадбирлар давомида республика бўйича табиий газдан 228 та ҳолатда ноқонуний фойдаланиб келинаётгани аниқланган, дея хабар бермоқда вазирлик матбуот хизмати.
Хусусан, 4 миллион 278 минг куб метр табиий газдан ноқонуний фойдаланилган. Газ таъминоти ташкилотларига етказилган зарар миқдори эса 3 миллиард 832 миллион 900 минг сўмни ташкил қилган.
«Ушбу ҳажмдаги табиий газ ҳозирги кунда 427 минг 830 та хонадоннинг 1 кунлик истеъмолини ташкил қилади. Бошқача айтганда, табиий газнинг бундай ҳажми Наманган ва Андижон вилоятларидаги жами аҳоли хонадонларининг бир кунлик истеъмолини ташкил қилади», – дейилган хабарда.
Қайд этилишича, ушбу ноқонуний фойдаланиш ҳолатларининг энг кўпи Наманган, Тошкент ва Хоразм вилоятларига тўғри келади.
Аниқланган ҳолатга ҳуқуқий баҳо бериш учун расмийлаштирилган ҳужжатлар ҳуқуқни муҳофаза қилиш органларига юборилган.
Бундан аввал Ўзбекистон аҳолисининг табиий газдан қарздорлиги 500 млрд сўмдан ошгани, Намангандаги корхона 10 минг хонадоннинг 1 кунлик истеъмолига тенг газдан ноқонуний фойдалангани аниқлангани ҳамда Ўзбекистонда 2021 йил бошидан буён қарийб 78 млрд сўмлик газ ўғирлангани ҳақида хабар берилганди.