Михаил Саакашвилининг аҳволи очлик эълон қилгани сабаб ёмонлашгудек бўлса, қамоқхонада у олиб бориладиган 18-сонли даволаш муассасаси Грузия собиқ президетининг хавфсизлиги ва адекват даволанишини таъминлай олмайди. Бу ҳақда Грузия омбудсмани Нино Ломжарияга таяниб, «Korrespondent.net» хабар берди. Қамоқхона касалхонасини кўздан кечирган Ломжариянинг ёрдамчилари шу каби хулосага келган.
«Масалан, ушбу муассасада магнит-резонанс текширув, компьютер томография, дуплекс сканерлар ишларини амалга ошириб бўлмайди. Шунингдек, муассасада айни вақтда реаниматолог шифокор ишламайди, бироқ маъмуриятнинг тушунтиришича, яқин вақтлар ичида тегишли мутахассис келиши кутилмоқда», — дея таъкидлайди омбудсман.
Бундан ташқари, у «хавфсизлик нуқтаи назаридан маълум хатарлар»ни ҳам таъкидлаб ўтган.
«Инфратузилма ва муҳит маҳбусларнинг айрим гуруҳлари томонидан оғзаки тажовуз ва шовқин, ҳақоратлар ёки руҳий босим ўтказиш хавфини истисно этмайди», — дейди Ломжария.
Аввалроқ Грузия собиқ президенти Михаил Саакашвилига шифокорлар томонидан қон қуйиш амалиёти бажарилгач, унинг соғлиғи барқарорлашгани тўғрисида хабар берилганди. Шифокорлар Саакашвилини касалхонага ётқизишни тавсия қилган, бироқ уни қамоқхонадан клиникага ўтказиш ҳақидаги қарорни Грузия адлия ва соғлиқни сақлаш вазирлари, шунингдек, маҳаллий парламент аъзолари қабул қилиши керак.
Мавзуга доир:
Изоҳ (0)