Mixail Saakashvilining ahvoli ochlik e’lon qilgani sabab yomonlashgudek bo‘lsa, qamoqxonada u olib boriladigan 18-sonli davolash muassasasi Gruziya sobiq prezidetining xavfsizligi va adekvat davolanishini ta’minlay olmaydi. Bu haqda Gruziya ombudsmani Nino Lomjariyaga tayanib, “Korrespondent.net” xabar berdi. Qamoqxona kasalxonasini ko‘zdan kechirgan Lomjariyaning yordamchilari shu kabi xulosaga kelgan.
“Masalan, ushbu muassasada magnit-rezonans tekshiruv, kompyuter tomografiya, dupleks skanerlar ishlarini amalga oshirib bo‘lmaydi. Shuningdek, muassasada ayni vaqtda reanimatolog shifokor ishlamaydi, biroq ma’muriyatning tushuntirishicha, yaqin vaqtlar ichida tegishli mutaxassis kelishi kutilmoqda”, — deya ta’kidlaydi ombudsman.
Bundan tashqari, u “xavfsizlik nuqtayi nazaridan ma’lum xatarlar”ni ham ta’kidlab o‘tgan.
“Infratuzilma va muhit mahbuslarning ayrim guruhlari tomonidan og‘zaki tajovuz va shovqin, haqoratlar yoki ruhiy bosim o‘tkazish xavfini istisno etmaydi”, — deydi Lomjariya.
Avvalroq Gruziya sobiq prezidenti Mixail Saakashviliga shifokorlar tomonidan qon quyish amaliyoti bajarilgach, uning sog‘lig‘i barqarorlashgani to‘g‘risida xabar berilgandi. Shifokorlar Saakashvilini kasalxonaga yotqizishni tavsiya qilgan, biroq uni qamoqxonadan klinikaga o‘tkazish haqidagi qarorni Gruziya adliya va sog‘liqni saqlash vazirlari, shuningdek, mahalliy parlament a’zolari qabul qilishi kerak.
Mavzuga doir:
Izoh (0)