Суданда тўрт нафар вазир, шунингдек, Хартум штатининг юқори мартабали амалдорлари ҳибсга олинди. Армия мамлакат пойтахтига кириш йўллари ва кўприкларни ёпган, деб хабар беради «ТАСС».
Таъкидланишича, ҳибсга олинганлар орасида — алоқа, ахборот, молия ва саноат вазирлари бор. Шунингдек, Хартум губернатори ва мамлакатда ҳукмрон Суверен кенгаш вакилларидан бири қўлга олинган. Ҳибсга олиш ишлари давом этмоқда. Судан бош вазири Абдулла Хамдок армия томонидан уй қамоғига жойлаштирилган. Аввалроқ ҳукумат раисининг уйини ҳарбийлар қуршовга олган эди.
Мамлакатда асосий мухолиф ҳаракат ҳисобланувчи «Озодлик ва ўзгариш кучи» ҳозирда одамларни кўчага чиқишга ва «ҳарбийларнинг ҳокимиятни эгаллашга уринишига» қарши туришга чақирмоқда.
Al Arabiya телеканалининг маълумотларига кўра, Хартумда мобил алоқа ва интернет буткул ўчирилган. Шунингдек, стационар телефон алоқалари ҳам мавжуд эмас.
Яқин вақтлар ичида Суверен кенгаш раҳбари Абдул Фаттоҳ ал-Бурҳоннинг баёнот бериши кутилмоқда. Пойтахтда оммавий ҳибсга олиш ишлари ал-Бурҳоннинг ҳукумат раҳбари Абдулла Хамдок билан учрашувидан сўнг бошланган.
24 октябрь куни Судан полицияси пойтахт маркази кўчасини ёпиб қўйишга уринган юзлаб намойишчиларни қувиб юбориш учун кўзни ёшлантирувчи газдан фойдаланган. Хартумда икки ҳафтадан буён армия тарафдорларининг намойишлари давом этмоқда — улар ҳукуматнинг истеъфосини талаб қиляпти.
2019 йил апрелида Суданда давлат тўнтариши оқибатида 1993 йилдан буён президентлик қилиб келаётган Умар ал-Башир ҳокимиятдан четлатилган ва ҳибсга олинган эди. Ҳокимият Ҳарбий кенгаш қўлига ўтганди. Май ойида ҳарбийлар ва мухторият мамлакатда уч йил муддатга ўтиш даврини жорий қилишга келишиб олди. Бироқ мухолифат иш ташлашни бошлаб, ҳукуматни тезроқ шакллантиришга даъват этди. Мамлакатда тартибсизликлар давом этаверди.
2019 йил декабрида Умар ал-Башир коррупция ва чет эл валютасига ноқонуний эгалик қилгани учун икки йил муддатга ахлоқ тузатиш колониясига маҳкум қилинди. У ҳокимиятдан туширилгач, уйидан 130 миллион доллар пул солинган жомадонлар топилган.
Бугунги ҳарбий исён уюштиришга уриниш ал-Башир президентлигидан кейин Суданда юз берган биринчиси эмас. 2020 йил январида мамлакатда ҳокимиятни эгаллаб олишга разведка офицерлари уриниб кўрган эди. 2021 йилнинг сентябрида Суданда бир гуруҳ ҳарбийлар ҳукумат объектларини ўз назорати остига олишга ва давлат тўнтариши уюштиришга уринганди.
Мавзуга доир: Судан бош вазирига суиқасд уюштирилди
Изоҳ (0)