«Изтироб ва қайғумни ифодалашга тил ожиз». Алек Болдуин отиб қўйган ҳамкасбининг ўлими билан боғлиқ ҳодисага илк бор изоҳ берди

Америкалик актёр Алек Болдуин суратга олиш майдончасида юз берган ҳодиса ва операторнинг ўлими юзасидан изоҳ берди.

Аввалроқ актёр «Занг» (Rust) фильмини суратга олиш майдончасида икки нафар ҳамкасбига ўқ узгани, бунинг оқибатида оператор Галина Хатчинс ҳаётдан кўз юмгани, режиссёр Жоэл Соуснинг эса аҳволи оғирлиги ҳақида хабар берилганди. Маълум қилинишича, Болдуин полиция билан ҳамкорлик қилмоқда.

«Чуқур ҳурматга эга ҳамкасбимиз, она ва рафиқа — Галина Хатчинсни ҳаётдан олиб кетган фожиали воқеа билан боғлиқ изтироб ва қайғумни ифодалашга тил ожиз. Полиция билан ушбу фожиа қандай юз берганини ойдинлаштириш учун тўлиқ ҳамкорлик қилмоқдаман. Унинг турмуш ўртоғи ва оиласига ёрдам таклиф қилиб алоқада бўлиб турибман», — деб ёзган Болдуин Twitter саҳифасида.

Эслатиб ўтамиз, воқеа Американинг Нью-Мексико шаҳридаги Bonanza Creek Ranch ранчосида содир бўлган. «Занг» (Rust) картинаси маҳаллий ранчо бошлиғининг тасодифий ўлимидан кейин бобоси билан яширинишга мажбур бўлган 13 яшар бола ҳақида ҳикоя қилади. Калифорниялик режиссёр Жоэл Соус фильмда режиссёр сифатида иштирок этган. Болдуин сюжетга кўра боланинг буваси, Харланд Растнинг қотили ва картинанинг продюсери сифатида қатнашган.

Юз берган ҳодисадан кейин суратга олиш ишлари тўхтатилган.