Алек Болдуин суратга олиш майдончасида икки ҳамкасбини отиб қўйди. Оператор вафот этди, режиссёрнинг эса аҳволи оғир

Актёр Алек Болдуин «Занг» (Rust) фильмини суратга олиш майдончасида оператор Галин Хатчинс ва режиссёр Жоэл Соусга тасодифан ўқ узди. Суратга олиш ишлари Американинг Ню-Мексико шаҳрида давом этаётган бўлган.

Ўқ узилган қурол реквизит сифатида ишлатилаётган бўлган. The New York Times’нинг ёзишича, бу репетиция ёки суратга олиш ишлари давом этаётган паллада содир бўлган. Оқибатда 42 яшар Хатчинс ва 48 ёшли Соус яраланган. Ню-Мексико университетининг шифохонасига вертолётда олиб борилган Хатчинс ҳаётдан кўз юмган. Тез ёрдам машинасида Санта-Федаги Кристус Сент-Винсент тиббиёт марказига юборилган Соуснинг эса аҳволи оғир.

https://www.instagram.com/p/CVNiEl6lJqD/?utm_source=ig_embed&ig_rid=668f8ff1-fca4-4e13-8ae1-69669bf10a54

Полиция ходимларининг маълум қилишича, ўқ узилиши билан боғлиқ тафсилотлар ҳозирча маълум эмас. Айни вақтда қуролдан айнан қандай фойдаланилгани ва ўқлангани аниқлаштирилмоқда. Суратга олиш жамоасининг аъзоси ўз навбатида қурол ўқсиз бўлгани ва ишлатилганида ўқ узилмаганини таъкидлаган.

Маълум қилинишича, Болдуинни сўроқ қилиш аллақачон бошланган. 63 яшар актёр Санта-Фе шерифининг офиси олдидан олиб кетилган. Кўз ёшларини тия олмаган Алек бу вақтда телефонда гаплашаётган бўлган. Актёр кўрсатма беришга ихтиёрий рози бўлган, ундан кейин эса ҳибсга олинган. Айни вақтда унга қарши айблов эълон қилинмаган.

Қайд қилинишича, Украинада туғилган Галина Хатчинс журналистика факультетини тамомлаганидан кейин Европадаги ҳужжатли фильмларни суратга олиш жараёнида текширувчи-журналист бўлиб фаолият юритган. 2015 йилда Лос-Анжелесдаги Америка киносанъат институтини тамомлаган. 2019 йилда Американинг Кинематографлар жамияти журнали уни кинонинг донғи чиқаётган юлдузлар рўйхатига киритган. Калифорниялик режиссёр Жоэл Соус эса беш нафар фильмда сценарий муаллифи ва режиссёр сифатида иштирок этган.

Алек Болдуиннинг ўзи эса 150 дан ортиқ фильм ва сериалларда суратга тушиб улгурган. «Перл-Харбор», «Уйланиш одати» картиналари машҳурликка эришган. «30-студия» сериалидаги роли учун бирваракайига уч марта «Олтин глобус» мукофотини қўлга киритган.

«Занг» (Rust) маҳаллий ранчо бошлиғининг тасодифий ўлимидан кейин бобоси билан яширинишга мажбур бўлган 13 яшар бола ҳақида ҳикоя қилади. Соус фильмда режиссёр сифатида иштирок этган. Болдуин сюжетга кўра боланинг буваси, Харланд Растнинг қотили ва картинанинг продюсери сифатида қатнашган. Ундан ташқари, фильмда Тревис Фиммел ва Женсен Эклс ҳам рол ижро қилган. Юз берган ҳодисадан кейин суратга олиш ишлари тўхтатилган.