Тинчлик ва фаровонлик — муҳим демократик қадрият

Сайловлар яқинлашгани сари айрим кучлар, хусусан, қўштирноқ ичидаги мухолифатчилар томонидан аҳолига бузғунчи ғояларни сингдириш, жамият аъзоларининг онгига руҳий таъсир кўрсатиш жадаллашади. «Демократик» қадриятлар ниқоби остида тинчликни бузишга, ҳокимиятни босиб олишга очиқдан-очиқ даъват этиш кузатилаётгани хавотирга солмасдан қолмайди. Афсуски, бундай тарғиботчиларнинг асосий мақсади халққа кўмаклашиш эмас, балки жамият фаровонлигига путур етказиш, ҳокимиятни эгаллаш ҳисобланади.

Яқин Шарқда авж олган «Араб баҳори» каби воқеаларнинг асосий мақсади нима эканлиги орадан йиллар ўтиб исботланди. Авваломбор, бу «инқилоб»лар на иқтисодиёт ва инсонлар ҳаётининг яхшиланишига, на коррупциянинг олдини олишга, на ҳуқуқ устуворлигига олиб келди. «Араб баҳори» қочоқлар сонининг қарийб 9 баравар ошишига сабаб бўлди, мамлакатларни терроризм хавфи энг юқори бўлган 20 давлат қаторига олиб кирди.

Бундан ташқари, айрим «инқилоблар» ортида хорижий кучларнинг борлиги бу каби ҳаракатлар мамлакатда эркинлик ўрнига қарамлик руҳини шаклланишига олиб келишини англатади. Демак, бузғунчи ғояларга берилмаслик, «инқилоб» ҳолатларига йўл қўймаслик учун огоҳ бўлиш зарур.

Бир тарихчи айтганидек, «тарих устоз эмас, балки назоратчидир: бизни ҳеч нарсага ўргатмайди, лекин билмаганлигимиз учун қаттиқ жазолайди».

Шоҳжаҳон Хўжаев, Тошкент давлат юридик университети кафедра мудири