Олий Мажлис Сенатнинг ХХ ялпи мажлисида автомобиль йўллари ҳамда сунъий иншоотларнинг ҳолати ва транспорт воситаларининг хавфсиз ҳаракатланишини таъминлашга доир қонун ҳужжатларининг ижро этилиши юзасидан Вазирлар Маҳкамасига юборилган парламент сўрови натижалари муҳокама қилинди, деб хабар беради парламент юқори палатаси матбуот хизмати.
Маълум қилинишича, кўприк ва йўл ўтказгичлар техник ҳолатини яхшилашга қаратилган ҳукумат қарори, Ўзбекистоннинг 2030 йилгача автомобиль йўлларини ривожлантириш стратегияси лойиҳаси тайёрланган. Шунингдек, тегишли ҳужжат асосида «Ўзйўлинспекцияси»га тадбиркорлик субъектлари томонидан йўл-қурилиш ишлари олиб борилаётган объектларда сифат назоратини оператив ўтказиш ҳамда содир этилаётган қоидабузарликларни ўз вақтида аниқлаш ваколати берилган.
Бироқ парламент сўровида кўтарилган айрим масалалар юзасидан асосли жавоблар тақдим этилмаган.
Хусусан, Вазирлар Маҳкамасининг 2006 йил 1 ноябрдаги 226-сонли қарорига илова қилинган «Автомобиль йўлларини таъмирлаш ва сақлаш ишлари таснифи»да автомобиль йўлини жорий таъмирлаш ишлари бажарилганидан сўнг унинг хизмат қилиш муддатига нисбатан талаб белгиланмагани ва бу ҳол жиддий муаммоларга сабаб бўлаётгани эътиборсиз қолдирилган.
Бундан ташқари, тегишли объектларда пудратчи томонидан бажарилаётган қурилиш-монтаж ишлари сифатини аниқлаш бўйича синов лабораторияси айнан пудратчининг ўзи томонидан жалб қилинаётгани коррупциявий ҳолатларга сабаб бўлаётгани билан боғлиқ масала ечими юзасидан ҳам аниқ жавоб тақдим этилмаган.
Жавобни муҳокама қилиш жараёнида мазкур сўровда кўтарилмаган бошқа долзарб масалалар ҳам мавжудлиги аниқланган.
Хусусан, автомобиль йўлларида ҳаракат хавфсизлигини таъминлашга қаратилган тадбирлар етарли даражада молиялаштирилмаяпти. 2021 йилда ушбу мақсадлар учун йўналтирилган маблағ мавжуд эҳтиёжнинг бор-йўғи 27 фоизни (дастлабки ҳисоб-китобларга кўра 2,9 триллион сўм зарур бўлса-да, 781,8 миллиард сўм ажратилган) ташкил қилади.
«Бу эса таъмирлаш ўртасидаги муддатларнинг йилдан йилга ортиши, қўшимча сарф-харажатлар талаб этилишига сабаб бўлмоқда», — дейилади хабарда.
Бундан ташқари, соҳада коррупция билан боғлиқ қонун бузилишларига тўлиқ барҳам берилмаётгани қайд этилган.
Маълумотларга қараганда, 2019-2020 йиллар ва 2021 йилнинг биринчи ярмида транспорт соҳасидаги корхона ва ташкилотларнинг 375 нафар ходими жиноий жавобгарликка тортилган ва уларнинг 358 нафари ёки 95 фоизи коррупциявий жиноятлар содир этган.
«Ҳолбуки Транспорт вазирлиги ҳузуридаги Йўл қурилиш ишлари сифатини назорат қилиш инспекцияси томонидан сўнгги икки йилда 2 мингдан ортиқ қонун бузилиш ҳолатлари аниқланган бўлса-да, прокуратура органларига бор-йўғи 8 та материал юборилган», — дейди сенатор.
Сенаторлар ҳукуматнинг ахборотидан қониқмагани сабабли 5 февралга қадар манфаатдор вазирлик ва идораларни жалб этган ҳолда ушбу соҳадаги муаммо, камчиликларни қўшимча равишда ўрганиш ва уларни ечими юзасидан аниқ ахборот тайёрлаш вазифаси юклатилган.
Эслатиб ўтамиз, март ойида 2021 йили Тошкентнинг йўл инфратузилмаси ва ички марказий кўчаларини таъмирлашга 467,3 миллиард сўм йўналтирилиши маълум бўлганди.
Изоҳ (0)