Жонс Ҳопкинс университети маълумотларига кўра, дунёда коронавирусга чалинганлар сони 241,1 миллион кишидан ошди, шуларнинг 4,9 миллиондан кўпи вафот этган. Шунингдек, жаҳонда айни пайтгача 6,656 миллиарддан ортиқ дозада вакциналар қўлланилган.
Касалланганларнинг умумий сони бўйича АҚШ (45 миллион), Ҳиндистон (34 миллион), Бразилия (21,6 миллион), Буюк Британия (8,5 миллион) ва Россия (7,9 миллион) энг олдинда бормоқда.
ЖССТ дунё пандемиядан чиқадиган вақтни тахмин қилди
Дунёда коронавирус пандемияси келаси йилдаёқ тугаши мумкин, аммо COVID-19 нинг ўзи ҳеч қаерга кетмайди. Бу ҳақда Жаҳон соғлиқни сақлаш ташкилоти (ЖССТ)нинг Европа минтақавий идораси директори Ханс Клюге маълум қилди.«Мен оптимистман, фикримча, келаси йили биз пандемиядан чиқамиз, бироқ коронавирус тугамайди. Ва, эҳтимол, биз у билан бирга яшашимизга тўғри келиши мумкин. Бу худди грипп билан ёнма-ён яшашдек гап, биласиз. Гриппга қарши вакциналар бор. Ҳар йили улар янги штаммларга бироз мослаштирилади, одамлар эмланади ва ҳаммаси яхши кечади», — деди Клюге.
Унинг аниқлик киритишича, дунё аҳолисининг 80-85 фоизи COVID-19 га қарши эмланиши зарур.
«ЖССТ Европа минтақасининг 53 та давлатидан 35 тасида вакцинация ясси йўналишга чиқиб олди, яъни эмланган одамлар сони бошқа ўсмаяпти», — деди ЖССТ Европа идораси директори.
Клюгенинг қўшимча қилишича, ЖССТ ким ва қандай сабабга кўра эмланишни хоҳламаётганини тушуниш учун тадқиқот ўтказган.
«Биз аниқладикки, гап одамлар вакцинацияга қатъиян қаршилигида эмас. Аниқроғи, одамларда саволлар борки, уларга жавоб олишни истайди. Масалан, илгари вакциналар йиллар давомида ишлаб чиқилар эди, бу вакцина эса жуда тез яратилди, у ҳақиқатан ҳам хавфсизми? Ҳа, вакциналар барча текширув жараёнларидан ўтган ва улар хавфсиз», — деди Клюге.
Мисрда коронавирусга қарши чекловлар кучайтирилади
Мисрда 15 ноябрдан COVID-19 га қарши эмланмаган ёки ҳар ҳафта ПЗР-тест топширмаган офис ишчилари давлат муассасаларида ишлашга қўйилмайди. Бундай қарор мамлакат Соғлиқни сақлаш вазирлиги томонидан қабул қилинди. Ҳомиладор ёки эмизикли аёллар бундан мустасно.Бундан ташқари, 1 декабрдан COVID-19 га қарши эмланганлик ҳақидаги сертификати бўлмаган фуқаролар давлат ташкилотларига киритилмайди. Эмланмаган талабалар эса олий таълим муассасаларидаги машғулотларга қўйилмайди.
Мамлакатда 7 миллион киши коронавирусга қарши тўлиқ эмланган бўлса, 13 миллиони битта дозада вакцина олган.
Беларусда COVID-19 туфайли режали тиббий ёрдам тўхтатилди
Беларусь Соғлиқни сақлаш вазирлиги касалхоналарда ва поликлиникаларда режали тиббий ёрдам кўрсатишни вақтинчалик тўхтатди.Бунда гап клиник текширувлар, скрининг тадбирлари, реабилитация ёрдами, физиотерапевтик даволаш, режали стоматологик ёрдам ва кундузги бўлимларда даволаш тўхтатилиши ҳақида бормоқда. Вазирлик бундай қарорни «COVID-19 га чалинган беморларга тиббий ёрдам кўрсатишни такомиллаштириш» билан изоҳлади.
Беларусь ҳукуматининг расмий маълумотларига кўра, сўнгги бир кеча-кундузда мамлакатда 1956 кишида инфекция аниқланган, вирус тасдиқланган 15 киши вафот этган. Пандемия бошидан буён эса мамлакатда 573 943 киши касалланиб, 4417 киши вафот этган.
Шунингдек:- Германияда коронавирус чекловлари ноябрь охирида бекор қилиниши мумкин. Мамлакат соғлиқни сақлаш вазири Йенс Шпан фикрича, «эпидемиологик вазият»ни ноябрь охирида бекор қилиш мумкин. Германиянинг Роберт Кох институти айни пайтда пандемия билан боғлиқ вазиятни «мўътадил» деб баҳоламоқда. Чеклов чоралари мамлакатда 2020 йил 28 мартда киритилган эди.
- Скандинавияда авиакомпаниялар ниқоб тақишни талаб қилишдан тўхтайди. Norwegian авиакомпанияси 18 октябрдан Норвегия, Швеция ва Дания ўртасидаги рейсларда йўловчилардан ниқоб тақишни талаб қилмайди. Бундай хабарни бошқа бир қатор авиакомпаниялар ҳам эълон қилди. Аммо Скандинавия минтақасидан ташқаридаги йўналишларда аввалгидек ниқоб тақишга тўғри келади.
- Ҳиндистонда рекорд даражадаги вакцина захиралари бўлишига қарамай, эмлаш кампанияси секинлашди. Мамлакат ҳукумати дозалар ўртасида анча катта — 12 ҳафталик оралиқни ушлайди, ушбу стратегия вакцинация чоғида аҳоли қамровини кенгайтириш имконини берди. Ҳиндистоннинг вояга етган 944 миллион аҳолисининг 74 фоизи битта доза билан, 30 фоизи тўлиқ эмланган.
Изоҳ (0)