Jons Hopkins universiteti ma’lumotlariga ko‘ra, dunyoda koronavirusga chalinganlar soni 241,1 million kishidan oshdi, shularning 4,9 milliondan ko‘pi vafot etgan. Shuningdek, jahonda ayni paytgacha 6,656 milliarddan ortiq dozada vaksinalar qo‘llanilgan.
Kasallanganlarning umumiy soni bo‘yicha AQSh (45 million), Hindiston (34 million), Braziliya (21,6 million), Buyuk Britaniya (8,5 million) va Rossiya (7,9 million) eng oldinda bormoqda.
JSST dunyo pandemiyadan chiqadigan vaqtni taxmin qildi
Dunyoda koronavirus pandemiyasi kelasi yildayoq tugashi mumkin, ammo COVID-19 ning o‘zi hech qayerga ketmaydi. Bu haqda Jahon sog‘liqni saqlash tashkiloti (JSST)ning Yevropa mintaqaviy idorasi direktori Xans Klyuge ma’lum qildi.“Men optimistman, fikrimcha, kelasi yili biz pandemiyadan chiqamiz, biroq koronavirus tugamaydi. Va, ehtimol, biz u bilan birga yashashimizga to‘g‘ri kelishi mumkin. Bu xuddi gripp bilan yonma-yon yashashdek gap, bilasiz. Grippga qarshi vaksinalar bor. Har yili ular yangi shtammlarga biroz moslashtiriladi, odamlar emlanadi va hammasi yaxshi kechadi”, — dedi Klyuge.
Uning aniqlik kiritishicha, dunyo aholisining 80-85 foizi COVID-19 ga qarshi emlanishi zarur.
“JSST Yevropa mintaqasining 53 ta davlatidan 35 tasida vaksinatsiya yassi yo‘nalishga chiqib oldi, ya’ni emlangan odamlar soni boshqa o‘smayapti”, — dedi JSST Yevropa idorasi direktori.
Klyugening qo‘shimcha qilishicha, JSST kim va qanday sababga ko‘ra emlanishni xohlamayotganini tushunish uchun tadqiqot o‘tkazgan.
“Biz aniqladikki, gap odamlar vaksinatsiyaga qat’iyan qarshiligida emas. Aniqrog‘i, odamlarda savollar borki, ularga javob olishni istaydi. Masalan, ilgari vaksinalar yillar davomida ishlab chiqilar edi, bu vaksina esa juda tez yaratildi, u haqiqatan ham xavfsizmi? Ha, vaksinalar barcha tekshiruv jarayonlaridan o‘tgan va ular xavfsiz”, — dedi Klyuge.
Misrda koronavirusga qarshi cheklovlar kuchaytiriladi
Misrda 15-noyabrdan COVID-19 ga qarshi emlanmagan yoki har hafta PZR-test topshirmagan ofis ishchilari davlat muassasalarida ishlashga qo‘yilmaydi. Bunday qaror mamlakat Sog‘liqni saqlash vazirligi tomonidan qabul qilindi. Homilador yoki emizikli ayollar bundan mustasno.Bundan tashqari, 1-dekabrdan COVID-19 ga qarshi emlanganlik haqidagi sertifikati bo‘lmagan fuqarolar davlat tashkilotlariga kiritilmaydi. Emlanmagan talabalar esa oliy ta’lim muassasalaridagi mashg‘ulotlarga qo‘yilmaydi.
Mamlakatda 7 million kishi koronavirusga qarshi to‘liq emlangan bo‘lsa, 13 millioni bitta dozada vaksina olgan.
Belarusda COVID-19 tufayli rejali tibbiy yordam to‘xtatildi
Belarus Sog‘liqni saqlash vazirligi kasalxonalarda va poliklinikalarda rejali tibbiy yordam ko‘rsatishni vaqtinchalik to‘xtatdi.Bunda gap klinik tekshiruvlar, skrining tadbirlari, reabilitatsiya yordami, fizioterapevtik davolash, rejali stomatologik yordam va kunduzgi bo‘limlarda davolash to‘xtatilishi haqida bormoqda. Vazirlik bunday qarorni “COVID-19 ga chalingan bemorlarga tibbiy yordam ko‘rsatishni takomillashtirish” bilan izohladi.
Belarus hukumatining rasmiy ma’lumotlariga ko‘ra, so‘nggi bir kecha-kunduzda mamlakatda 1956 kishida infeksiya aniqlangan, virus tasdiqlangan 15 kishi vafot etgan. Pandemiya boshidan buyon esa mamlakatda 573 943 kishi kasallanib, 4417 kishi vafot etgan.
Shuningdek:- Germaniyada koronavirus cheklovlari noyabr oxirida bekor qilinishi mumkin. Mamlakat sog‘liqni saqlash vaziri Yens Shpan fikricha, “epidemiologik vaziyat”ni noyabr oxirida bekor qilish mumkin. Germaniyaning Robert Kox instituti ayni paytda pandemiya bilan bog‘liq vaziyatni “mo‘tadil” deb baholamoqda. Cheklov choralari mamlakatda 2020-yil 28-martda kiritilgan edi.
- Skandinaviyada aviakompaniyalar niqob taqishni talab qilishdan to‘xtaydi. Norwegian aviakompaniyasi 18-oktabrdan Norvegiya, Shvetsiya va Daniya o‘rtasidagi reyslarda yo‘lovchilardan niqob taqishni talab qilmaydi. Bunday xabarni boshqa bir qator aviakompaniyalar ham e’lon qildi. Ammo Skandinaviya mintaqasidan tashqaridagi yo‘nalishlarda avvalgidek niqob taqishga to‘g‘ri keladi.
- Hindistonda rekord darajadagi vaksina zaxiralari bo‘lishiga qaramay, emlash kampaniyasi sekinlashdi. Mamlakat hukumati dozalar o‘rtasida ancha katta — 12 haftalik oraliqni ushlaydi, ushbu strategiya vaksinatsiya chog‘ida aholi qamrovini kengaytirish imkonini berdi. Hindistonning voyaga yetgan 944 million aholisining 74 foizi bitta doza bilan, 30 foizi to‘liq emlangan.
Izoh (0)