Чехия сенати спикери Милош Вистрчил маълум қилишича, 19 октябрь куни сенатнинг конституциявий қўмитаси мамлакатнинг 77 ёшли президенти Милош Земаннинг касаллиги муносабати билан кейинги қадамларни муҳокама қилади, деб ёзади Meduza.
Вистрчилнинг айтишича, шифокорларнинг хулосасига кўра, Земан соғлиғи туфайли ўз мажбуриятларини бажара олмайди, «узоқ муддатли прогноз эса ўта ноаниқ деб баҳоланмоқда».
Сенат раҳбарига кўра, сенаторлар Чехия конституциясининг 66-моддасини амалга ошириш-оширмасликни муҳокама қилади, унга мувофиқ президентнинг вафоти ёки касаллиги муносабати билан унинг ваколатларининг бир қисми вақтинчалик сенат раҳбарига, яна бир қисми эса вакиллар палатаси спикерига ўтади. «Бошқа вариант, афсуски, йўқ — биз конституциянинг 66-моддасини қачон ва қай тарзда кучга киритишни муҳокама қилишимизга тўғри келади», — деди Милош Вистрчил.
Президент маъмурияти раҳбари Вратислав Минарж Чехия сенати спикерини матбуот ўйинида ва иккиюзламачиликда айблади.
10 октябрь куни Милош Земан сурункали касаллик билан боғлиқ асоратлар туфайли Прагадаги ҳарбий госпиталга ётқизилганди. Шифокорлар Земанга қўйилган ташхисни ошкор қилмаяпти.
Чехия президенти парламент сайловларида «Биргаликда» мухолифат коалициясига ютқазган «Норози фуқаролар акцияси» партияси раҳбари, бош вазир Андрей Бабиш билан учрашувдан кейин реанимацияга тушганди.
Чехиянинг Novinky нашри манбаларга таянган ҳолда, президентнинг касалхонага ётқизилишига сабаб буйрак муаммоси бўлса керак, дея ёзди.
Бундан аввал Земан сентябрь ойида саккиз кун Марказий ҳарбий касалхонага ётқизилган эди. Прага қалъаси буни режалаштирилган муолажа деб айтди. Земан 2013 йилда Чехия Республикаси президентига айланган. 2018 йилда у иккинчи беш йиллик муддатга қайта сайланган.
Изоҳ (0)