Жанубий Корея ҳарбийлари маълумотларига кўра, КХДР сувости кемалари учун мўлжалланган баллистик ракетани синовдан ўтказган, деб ёзади Meduza.
Ракета Япон денгизида, Шимолий Кореянинг Синпхо шаҳри яқинида учирилган. Жанубий Корея Мудофаа вазирлиги ракета сувости кемасидан учирилгани ёки синов парвози денгиз платформасидан амалга оширилгани юзасидан ҳозирча маълумотларга эга эмас.
КХДР томонидан ўтказилган ракета синовлари ҳақида Япония Мудофаа вазирлиги ҳам хабар берган. Япония ҳарбийларига кўра, иккита ракета учирилган, қолган тафсилотлар очиқланганича йўқ.
Сувости кемалари учун мўлжалланган баллистик ракета синови АҚШ томонидан КХДРга қарата Шимолий Корея дастури бўйича музокаралар ўтказишга оид навбатдаги даъват жаранглаганидан кейин кўп ўтмай ўтказилди. Associated Press қайд этишича, ракета отилиши музокаралар жараёни ҳозирча паузага қўйилганини ва Шимолий Корея қурол-яроғларини кучайтиришда давом этаётганини намойиш қилади.
КХДР томонидан баллистик ракета учирилгач, Жанубий Корея Миллий хавфсизлик кенгаши «чуқур афсус» билдирди ва Пхеньянни сулҳ бўйича музокараларга қайтишга чақирди.
Шимолий Кореяга нисбатан эълон қилинган халқаро санкциялар, шу жумладан, ядро ўқини ташишга қодир ракеталар ишлаб чиқиш ва синаш жараёнларига ҳам алоқадордир. КХДРга нисбатан ўз санкцияларини АҚШ ҳам киритган. КХДР билан халқаро кўмак ва санкцияларнинг юмшатилиши эвазига ядро дастури ва ракета синовларидан воз кечиш ҳақида музокаралар ўтказишга бир неча марта уриниб кўришган. Ҳозирча келишувларга узоқ муддатли риоя қилинишига эришилгани йўқ.
Аввалроқ Шимолий Корея янги турдаги зенит ракетасини синовдан ўтказганини маълум қилганди. Синовлар 30 сентябрь куни КХДР Мудофаа фанлари академияси томонидан ўтказилган
28 сентябрь куни Шимолий Корея мамлакат тарихида биринчи марта гипертовушли ракета учирганди. КХДР маълум қилишича, «Хвасон-8» деб номланган ушбу турдаги ракета синовлари муваффақиятли ўтган. Шунингдек, ўша куни Жанубий Корея штаб бошлиқлари қўмитаси КХДР Япон денгизи томон камида битта ракета учирганини маълум қилди. Kyodo манбаларига кўра, бу қисқа масофали баллистик ракета бўлган.
Ундан аввал КХДР 15 ва 13 сентябрь кунлари ракета учиргани ҳақида хабар берилган. Ўшанда Шимолий Корея ҳукумати ракеталар мамлакатнинг янгиланган мудофаа стратегияси доирасида синовдан ўтказилганини айтган.
Япония бош вазири Ёсихиде Суга КХДР фаолиятини ўз мамлакати ва бутун минтақа учун таҳдид деб атади. 26 сентябрь куни БМТ бош котиби Антонио Гутерриш инсоният ядро қуроллари сабабли йўқ бўлиб кетиш ёқасида турганини таъкидлади.
Шимолий Кореянинг БМТдаги вакили эса КХДР АҚШ ва Жанубий Корея хавфсизлигини ҳеч қачон бузмаслигини ваъда қилди.
Изоҳ (0)