Дунё ва ўзбек спортига оид 14 октябрь кунининг энг муҳим хабарлари дайжести билан танишинг.
Ўзбекистон
«Тошкент йўлбарси» Руфат Рисқиевга 3 хонали янги уй қуриб берилади
Афсонавий боксчи Руфат Рисқиев йил якунигача янги уйга кўчиб ўтади, деб ёзмоқда Миллий олимпия қўмитаси матбуот хизмати.
Қайд этилишича, Ўзбекистон бокс федерациясининг бош ҳомийси «Ўзбекистон темир йўллари» акциядорлик жамияти томонидан Руфат Рисқиевга янги хонадон қуриш ишлари бошланган.
Лойиҳага кўра, Руфат Рисқиевнинг хонадонидаги бўш ер майдонига барча қулайликларга эга замонавий 3 хонали уй қуриб берилади. Режа бўйича янги уй йил якунигача қуриб битказилади.
Бобур Абдухолиқов ва Шаҳзодбек Убайдуллаевда коронавирус аниқланди
«Энергетик-БГУ»нинг ўзбекистонлик футболчилари Бобур Абдухолиқов ва Шаҳзодбек Убайдуллаевда коронавирус аниқланган. Бу ҳақда клуб матбуот хизмати маълум қилди.
Қайд этилишича, 11 октябрь кунги тест натижаларида жамоанинг 9 нафар футболчиси, шу жумладан ўзбекистонлик ўйинчиларнинг иккисида ҳам COVID-19 аниқланган.
Таҳлили ижобий чиққан барча ўз турар жойида изоляцияга олинган, қолганлар машғулотларда давом этаётгани қўшимча қилинган.
Жаҳон
Рамоснинг «ПСЖ»даги дебюти кечикадиган бўлди
«ПСЖ» ҳимоячиси Серхио Рамос Лига 1 нинг 10-тури доирасидаги «Анжер»га қарши ўйинда ҳам майдонга туша олмайди.
Париж клубига кўра, испаниялик футболчи яна 10 кун давомида якка тартибда машғулот ўтказади. Шундан кейингина у умумий гуруҳга қўшилиши режалаштирилган.
35 ёшли Рамос жароҳати туфайли ҳамон янги клубида дебют қилгани йўқ. Аввалроқ Рамоснинг «Анжер»га қарши баҳсда иштирок этиши мумкинлиги айтилганди.
«Барселона» Педри билан шартномани узайтирди ва унинг нархини 1 млрд евро этиб белгилади
«Барселона» ярим ҳимоячи Педри билан шартнома узайтирилганини эълон қилди.
18 ёшли футболчи клуб билан 2026 йилгача мўлжалланган янги шартномага имзо чеккан. Унинг товон пули миқдори 1 миллиард евро этиб белгиланди.
«Бавария» ҳам Ҳоландга қизиқиш билдирмоқда
«Бавария» «Боруссия Д» ҳужумчиси Эрлинг Ҳоландга қизиқиш билдирмоқда.
Билдъга кўра, агар Роберт Левандовски жамоани тарк этадиган бўлса, Мюнхен жамоаси «Боруссия Д» форвардини сотиб олишга уриниб кўради.
Ҳозирда Ҳоланднинг товон пули 75 млн евро эканлиги айтилмоқда. Шунингдек, яна 30—40 млн евро футболчининг агенти Мино Райолага комиссия сифатида тўланади.
Аввалроқ Ҳоланд «Манчестер Сити»нинг асосий трансфер мақсади эканлиги ҳақида хабар берилганди.
Роналдо «Олтин тўп» учун курашда Бенземага овоз беради
«Реал» ва «Интер»нинг собиқ ҳужумчиси Роналдо бу йилги «Олтин тўп» совринини Мадрид клуби ҳужумчиси Карим Бензема қўлга киритишини хоҳламоқда.
«Менинг »Олтин тўп»га номзодим Бензема, бунга ҳеч қандай шубҳа йўқ.
У энг яхши ҳужумчи, охирги 10 йилдаги ҳақиқий «йиртқич» ва энг муҳими, чемпион. Сиз бундай ўйламайсизми?», — деб ёзди бразилиялик собиқ футболчи Instagram саҳифасида.
Ферран Торрес бир ой муддатга сафдан чиқди
«Манчестер Сити» ярим ҳимоячиси Ферран Торрес жароҳати туфайли бир ой давомида майдонга туша олмайди. Бу ҳақда Diario Sport хабар тарқатди.
Тиббий кўрикдан сўнг футболчига товон синиши ташхиси қўйилган. Испаниялик футболчи ушбу жароҳатни Миллатлар Лигаси доирасида Италияга қарши ўйинда олганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)