Британия матбуоти Россия Оксфорддан коронавирусга қарши AstraZeneca вакцинасининг формуласини ўғирлаб, у асосида «Спутник V»ни яратгани ҳақидаги мақолалар учун узр сўради. Бу ҳақда Россия тўғридан-тўғри инвестиция фонди (РТИФ) маълум қилди.
«Ғийбат ва қалбаки маълумотлар билан донг таратган Британиянинг бир қатор сариқ газеталари кечирим сўрашга мажбур бўлди ва навбатдаги сохта маълумотларини инкор этди», — дейилади фонд хабарида.
Таҳририят ходимлари аввалроқ тарқатилган РТИФ баёнотининг рад қилиб бўлмайдиган далиллари билан юзлашгандан сўнг ушбу қадамни қўйган.
Фонднинг таъкидлашича, Daily Express ўз саҳифасида чоп этилган мақола нусхасини биринчи бўлиб бутунлай ўчириб ташлаган ва кейинроқ узр сўраган. The Sun’да чиқарилган мақоланинг асл нусхаси муаллифлари РТИФ баёнотидан иқтибослар келтириб матннинг қайта кўриб чиқилган версиясини нашр этган, шунингдек, фонднинг асл мақолада берилган маълумотни рад этувчи изоҳини чоп этган.
«Daily Express нашри ‘Спутник V’ вакцинасининг ишлаб чиқарувчилари ўз дори-дармонларини яратишда Оксфорд университети формулаларидан фойдалангани ҳақида ёлғон маълумот тақдим этганини тан олди», — дейилади фонд хабарида. РТИФ бу ҳолатни Ғарб оммавий ахборот воситаларида «Спутник V»га қарши олиб борилаётган салбий кампания билан курашдаги навбатдаги ғалаба деб атади.
The Sun 10 октябрь куни Россия «Спутник V»ни яратиш учун AstraZeneca вакцинасининг формуласини ўғирлаб кетгани ҳақида мақола эълон қилганди. Унда айтилишича, «россиялик айғоқчи» Оксфорд университети ва AstraZeneca инглиз-швед компанияси томонидан биргаликда ишлаб чиқилган формулани ўғирлаган.
Нашрга кўра, Америка разведка хизмати маълумотларида Россия »Спутник V»да Оксфорддаги ишлаб чиқариш технологияларидан нусха кўчиргани айтилган. Газета манба кўрсатмасдан, махсус хизматлар бу ҳақда айрим вазирларга хабар берганини ёзди.
РТИФ мақолага изоҳ берар экан, «бу аноним манбаларга асосланган қип-қизил ёлғон» эканини айтди. Фонд ушбу мақола «ҳеч қандай илмий маънога эга эмас» деган фикрда. Улар «Спутник V» инсон аденовируси асосида яратилганини, AstraZeneca вакцинаси эса шимпанзе аденовирусига асосланганини эслатиб ўтди.
Худди шундай одам аденовируслари платформасидан Россиянинг Гамалея номидаги дори-дармон ишлаб чиқарувчи марказининг аввалги ишларида, жумладан, 2017 йилда Эбола ва 2019 йилда Яқин Шарқ респиратор синдромига (MERS) қарши вакциналар яратишда фойдаланилган, дейди РТИФ.
Россия ташқи ишлар вазири Сергей Лавров AstraZeneca’нинг айбловларини асоссиз деб атади. «Эсимда, AstraZeneca кўп ҳолларда тромбоз ва бошқа ножўя таъсирлар кўрсатганди. «Спутник V» билан эса ҳеч қачон бундай ҳолат бўлмаган», — таъкидлади ТИВ раҳбари.
AstraZeneca вакцинаси векторли бўлиб, бунда SARS-CoV-2 вирусининг генетик маълумоти инсон организмига шимпанзеларга юқтирилган аденовирусга асосланган ташувчи томонидан етказилади. Вакцина 2020 йил июнь ойида ҳали синовлари тугамасдан туриб ишлаб чиқарила бошлаган, декабрь ойида Британия уни расман тасдиқлаган.
Гамалея номидаги марказнинг «Спутник V» вакцина ҳам векторли, лекин у одамлар қабул қиладиган икки турдаги аденовирус асосида ишлайди. У 2020 йил 11 августда рўйхатдан ўтган. 2021 йилнинг март ойида марказ директори Александр Гинцбург Россия вакцинаси инглиз-швед вакцинасидан фарқ қилишини, «Спутник V»да тозалик даражаси анча юқори эканини айтган.
Россия тўғридан-тўғри инвестиция фонди «Спутник V»ни ишлаб чиқариш ва тарқатиш билан шуғулланади.
Изоҳ (0)