«Толибон» АҚШ билан Доҳада бўлиб ўтган музокараларни муваффақиятни деб ҳисоблади
«Толибон» ҳаракати 10 октябрь, якшанба куни якунланган АҚШ делегацияси билан музокараларни муваффақиятли деб атади.
«Афғонистон Ислом Амирлиги ва Америка Қўшма Штатлари делегациялари ўртасидаги икки кунлик мулоқот муваффақиятли кечди. Учрашув чоғида сиёсий масалалар батафсил муҳокама қилинди. Доҳа битимининг тўлиқ бажарилиши Ислом амирлиги томонидан муаммоларни ҳал қилишнинг энг яхши усули сифатида кўриб чиқилаётган эди, бундан ташқари, гуманитар ёрдам сиёсий масалаларга боғлиқ бўлмаслиги керак», — дейилади «Толибон» баёнотида.
Таъкидланишича, АҚШ вакиллари афғонистонликларга гуманитар ёрдам бериб, бошқа гуманитар ташкилотларнинг кўмак бериши учун шароитларни таъминлашга ваъда берган. Толиблар ўз навбатида бундай ечимни маъқуллаган.
«Дипломатик муносабатларни яхшироқ ҳолатгача қайта тиклаш учун ҳаракат қилиш керак», — дейилади толиблар баёнотида.
Шунингдек, «агар зарур бўлса», келажакда яна шундай учрашувлар ўтказишга қарор қилинган.
Аввалроқ Америка Давлат департаменти Доҳадаги музокаралар якунлари бўйича баёнот эълон қилганди. Унда учрашув «самимий ва профессионал» деб тавсифланган. АҚШ Афғонистондаги инсон ҳуқуқлари муаммосига эътибор қаратди ҳамда «Толибон» режимига уларнинг ҳаракатларига қараб баҳо беришини қайта таъкидлади.
«Толибон» Россия билан ўз ҳукумати тан олиниши юзасидан музокаралар олиб бормоқда
Толиблар Россия билан ўз ҳукуматининг тан олиниши ва ўзаро элчихоналар очилиши ҳақида музокаралар олиб бормоқда, деди Афғонистон ахборот ва маданият вазири вазифасини бажарувчи Забиҳулла Мужоҳид.«Биринчи навбатда гап дипломатик алоқалар ҳақида бормоқда, уларсиз кейинги ҳамкорликни амалга ошириб бўлмайди. Биз Россия билан, асосан, ҳукуматимизнинг тан олиниши ва элчихоналар очилиши юзасидан музокаралар ўтказяпмиз», — деди Мужоҳид.
У Россия сўнгги ўн йилликлар мобайнидаги жанговар ҳаракатлар оқибатида жабр кўрган Афғонистонни қайта тиклашда иштирок этишига умид билдирди.
«Толибон» собиқ амалдорларнинг 16 млн доллардан ортиқ пулини мусодара қилди
Афғонистоннинг Панжшер, Хост, Кобул ва Лувгар вилоятларида «Толибон» ҳаракати аввалги маъмуриятдаги мансабдор шахсларга тегишли бўлган 16 миллион доллардан ортиқ маблағни мусодара қилди. Пуллар Афғонистон Молия вазирлиги ҳисобига ўтказилди.«Аввалги порахўр маъмуриятнинг баъзи аъзоларидан олинган пуллар Молия вазирлигининг махсус ҳисобига ўтказилди», — дейилади Афғонистон Марказий банки хабарида. Таъкидланишича, дастлаб толиблар маблағни Марказий банкка топширган, сўнг эса «мусодара қилинган барча маблағлар эсон-омон банк ғазнасига ўтказилган».
«Толибон» август ўрталарида Афғонистонда ҳокимиятни эгаллаб олганидан кейин АҚШ Афғонистон ҳукуматининг Америка банк ҳисобларида сақланаётган захираларини музлатиб қўйган эди. Халқаро валюта жамғармаси эса мамлакат раҳбарияти мақоми билан боғлиқ вазият ноаниқлиги сабабли Афғонистонга кўмак бериш тўхтатилишини эълон қилди.
Афғонистондаги ягона спорт телеканали ўз ишини тўхтатди
Афғонистоннинг ягона спорт канали 3Sport ўз дастурларини узатишни тўхтатди. Бу ҳақда маҳаллий ТОLО News канали телеканал раҳбари баёнотига таяниб хабар берди.Бунга иқтисодий инқироз, шунингдек, «Толибон» ҳокимият тепасига келганидан кейин ОАВлар фаолиятига қўйилган чекловлар сабаб бўлди.
«3Sport фаолияти тўхтатилишининг асосий сабаби барча ОАВларга, хусусан, 3Sport’га қўйилган чекловлар бўлди. ОАВлар ижтимоий, иқтисодий ва сиёсий соҳадаги бошқа муаммолар билан ҳам курашмоқда», — деди 3Sport раҳбари Шафиқулла Салим Поя.
Октябрь бошида Афғонистоннинг Khaama Press агентлиги мамлакат Журналистлар миллий уюшмасига таяниб, афғон ОАВларининг 70 фоизи ўз фаолиятини якунлаганини маълум қилганди. Аввалроқ эса Афғонистон журналистлар иттифоқи вакили Масрур Лутфий ишлашда давом этаётган ОАВлар «хавфсизлик соҳасида доимий хавфга учраётгани ва молиявий кўмак йўқлигидан жиддий хавотирда экани»ни билдирганди.
Изоҳ (0)