«Россия 24» телеканали 9 октябрь куни «Ўзбекистон. Энг янги тарих» номли ҳужжатли фильмни тақдим этди. Унда асосан Ўзбекистонда сўнгги беш йилда юз берган ижобий ўзгаришлар ҳақида сўз боради. Фильмда Президент Шавкат Мирзиёевнинг турли тадбирларидаги чиқишлари, вилоятларга сафарлари, корхона ва ташкилотлардаги учрашувлари, жойлардаги фаоллар билан мулоқотларидан лавҳалар ҳам берилган.
Лавҳаларнинг бирида, жумладан, давлат раҳбари Сурхондарё вилояти Ангор туманидаги «Ангор Сурхон ғурури» кластерига ташрифи давомида мулозимлардан бирига телефон орқали топшириқ бераётгани акс этган. Президент бу кластерда 2021 йилнинг 1 июнь куни бўлган эди.
«Ассалому алайкум! Ҳозир мен Ангор туманидаман. Ангор туманининг кластери бор, бугун кечга бутун кластерни айланиб, ҳамма масаласини ҳал қилиб бериб, эртага эрталаб менга ҳисобот берасан. Шундай хизмат қилгинки, у сендан миннатдор бўлсин. Бу менинг топшириғим», — деб Президент Шавкат Мирзиёев қўлидаги iPhone’ни кластер ходимларидан бирига узатади.
Аввалроқ, август ойида ижтимоий тармоқларда Президент Шавкат Мирзиёев iPhone смартфони орқали мулоқот қилаётгани акс этган сурат тарқалган эди, бироқ бу суратнинг қачон ва қаерда олинганига аниқлик киритилмаган эди.
2019 йил август ойида ўша вақтдаги Президент матбуот котиби Комил Алламжонов Alter Ego дастурига берган интервьюсида «Президент мобил телефондан фойдаланадими?» деган саволга: «Мен буни аниқ билмайман, лекин бир-икки марта мобил телефон орқали гаплашганини кўрганман», дея жавоб берган эди.
Қайд этиш жоиз, Мирзиёев «Ангор Сурхон ғурури» кластерига ташрифи давомида ғалла ўриш комбайнини ҳам бошқарган эди.
Изоҳ (0)