АҚШда коронавируснинг дельта штамми билан касалланган болалар орасида мултисистемали яллиғланиш синдромига чалиниш ҳолатлари кўпайди. Касаллик тафсилотлари АҚШ мутахассислари томонидан маълум қилинган, деб ёзади ABC News.
Мултисистемали яллиғланиш синдроми (MIS-C) — бу тананинг турли қисмлари, шу жумладан, юрак, ўпка, буйрак, мия ва терига таъсир қиладиган камдан кам учрайдиган касаллик. Шунингдек, кўзлар ёки ошқозон-ичак йўлининг органлари яллиғланади.
MIS-C одатда, COVID-19 га чалингандан тўрт-олти ҳафта ўтгач пайдо бўлади. АҚШда касалланишнинг ўсиши ёзда коронавирусининг дельта штамми кенг тарқалишидан сўнг содир бўлди.
Шифокорларнинг таъкидлашича, синдром болаларда жиддий касалликлар келтириб чиқариши ва ўлимга олиб келиши мумкин. CDC маълумотларига кўра, айни пайтда ушбу касаликка ташхис қўйилган болаларнинг кўпчилиги тиббий ёрдам билан тузалиб кетмоқда.
АҚШда MIS-C билан 5217 та касалланиш ҳолати ҳамда синдром туфайли 46 та ўлим ҳолати тасдиқланган. Шу билан бирга, касалликка чалиниш ҳолатларининг 61 фоизга яқини лотинамерикалик ёки қора танли болаларда қайд этилган. Қолаверса, бу касалликдан 6 ёшдан 11 ёшгача бўлган болалар кўпроқ зарар кўрмоқда.
АҚШда 5,9 миллион болада коронавирус тасдиқланган бўлса, MIS-C инфекциясига чалинганлар сони атиги 0,0009 фоизни ташкил қилади. Бироқ июль—август ойларида MIS-C билан касалланишнинг ўртача сони деярли икки баравар кўпайди. Нашрнинг хабар беришича, Қўшма Штатлардаги кўплаб болалар шифохоналари сўнгги ойларда MIS-C ҳолатларининг ортиши ҳақида хабар берган.
Эслатиб ўтамиз, июнь ойида Ҳиндистонда COVID-19 дан тузалган болаларда мултисистемали яллиғланиш синдромига чалиниш бўйича 2000 дан ортиқ ҳолат қайд этилганди.
Изоҳ (0)