АҚШ президенти Жо Байден россиялик ва филиппинлик журналистлар Дмитрий Муратов ҳамда Мария Рессани тинчлик бўйича 2021 йилги Нобель мукофотига сазовор бўлгани билан табриклади. Бу ҳақда Оқ уй баёнотига таяниб «Интерфакс» хабар берди.
«Филиппинлик Мария Ресса ва россиялик Дмитрий Муратовни бу йилги тинчлик бўйича Нобель мукофоти лауреатлари деб топилиб, муносиб шарафга сазовор бўлгани билан табриклайман. Бутун дунёдаги кўплаб журналистлар сингари, Ресса ва Муратов ҳам тинимсиз ва қўрқмасдан фактларни кузатади»,— дейди у.
АҚШ президентининг қўшимча қилишича, мукофотга сазовор бўлган журналистлар ҳокимиятни суиистеъмол қилиш ҳолатларни чеклаш ва коррупцияни фош этиш устида ишлаган.
«Ресса, Муратов ва улар каби бутун дунёдаги журналистлар ҳақиқат ғояси учун глобал курашнинг бошида турибди», — дея қўшимча қилди Байден.
Эслатиб ўтамиз, 8 октябрь куни тинчлик бўйича Нобель мукофотига Россиянинг «Новая газета» нашри бош муҳаррири Дмитрий Муратов ва филиппинлик журналист, Rapple мухолифатчи сайти раҳбари Мария Ресса сазовор бўлди. Нобель мукофоти уларга «демократия ҳамда барқарор тинчлик ўрнатилишининг дастлабки шарти бўлган фикр билдириш эркинлигини ҳимоя қилиш бўйича интилишлари» учун берилган.
Ўтган йили тинчлик бўйича Нобель мукофоти очликка қарши курашувчи энг йирик гуманитар ташкилот бўлган Жаҳон озиқ-овқат дастурига берилган эди.
Тинчлик мукофоти — Нобель мукофотлари орасида совриндорлар Стокгольмда эмас, Ослода эълон қилинадиган ва тақдирланадиган ягонаси.
11 октябрь куни иқтисодиёт бўйича мукофот совриндорлари эълон қилинганидан кейин Нобель ҳафталиги якунланади. Аввалроқ физиология ва тиббиёт, физика, кимё, адабиёт йўналишлари бўйича 2021 йилги Нобель мукофотининг соҳиблари аниқланганди.
Изоҳ (0)