Ўзбекистон Ташқи ишлар вазирлиги Афғонистондаги масжидлардан бирида содир бўлган портлаш юзасидан расмий баёнот берди.
8 октябрь куни Афғонистондаги масжидда юз берган портлаш оқибатида 100 га яқин одам ҳалок бўлгани тўғрисида хабар берилганди. Ҳозиргача ҳеч бир қуролли мухолифатчи гуруҳ портлаш учун жавобгарликни ўз зиммасига олмаган. Бироқ илгари шиаларга қарши кўплаб ҳужумлар учун жавобгарликни ИШИД бўйнига олганди.
Ташқи ишлар вазирлиги баёнотида таъкидланишича, Ўзбекистон Қундуз шаҳрида жума намози пайтида кўплаб қурбонларни келтириб чиқарган террорчилик ҳаракатини кескин қоралайди.
«Бундай зўравон ҳаракатлар Афғонистонда барқарор ва узоқ муддатли тинчлик ҳамда миллий келишувни ўрнатишга тўсқинлик қилади», — дейилади хабарда.
Ўзбекистон ҳукумати ушбу ғайриинсоний ҳужумда ҳалок бўлганлар ва жароҳатланганларнинг оилаларига чуқур ҳамдардлик ва таъзия изҳор этади.
Эслатиб ўтамиз, бу Афғонистонда сўнгги бир ҳафта ичида содир бўлган биринчи портлаш эмас. «Afghanistan.ru» хабарига кўра, ўтган якшанба куни Кобулдаги масжид яқинида портлаш содир бўлган ва бунинг учун жавобгарликни ИШИД ўз зиммасига олган. Бундан ташқари, 6 октябрь куни кечаси Хост вилоятидаги диний мактаб ташқарисида яна бир ҳужум уюштирилган, 1 октябрь куни эса Парвон вилоятининг шимолида терактлар содир этилгани хабар қилинган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)