АҚШда электромобиллар ишлаб чиқарувчи Tesla компаниясининг штаб-квартираси Калифорния штатининг Кремний водийсидаги Пало-Альто шаҳридан Техас штатининг Остин шаҳрига кўчирилади. Компания бош офисининг бошқа жойга кўчирилиши ҳақида унинг бош директори ва асосчиси Илон Маск акциядорларнинг йиллик йиғилишида эълон қилди, деб ёзади CNBC.
Телеканал Tesla Остинда автомобиль йиғиш заводини қураётганини эслатиб ўтди. «Очиғини айтганда, биз Калифорниядаги операцияларимизни кенгайтиришда давом этамиз», — деди Маск, шунингдек, компания Фремонт ва «Гига Невада»даги мавжуд иншоотларини кенгайтиришни режалаштирмоқда.
Остин мэри Стив Адлер электрон мактубида Маскнинг қарорига изоҳ бериб, расмийлар Tesla’ни «уйидагидек» қарши олишини ёзган.
Маск компанияни Калифорниядан Техасга кўчиришни режалаштираётгани ҳақида CNBC декабрь ойида хабар берганди. Телеканал маълумотларига кўра, тадбиркор тез-тез Техасга ташриф буюриб, кўп вақтини Остинда ўтказган. Шаҳарда Tesla филиалидан ташқари, Маскнинг Boring компанияси жойлашган бўлиб, у инфратузилма ва туннеллар қуриш билан шуғулланади. Шунингдек, Маск соҳил бўйидаги Бока-Чика қишлоғига ташриф буюрган. У ерда ўзи асос солган яна бир корпорация — SpaceX жойлашган. Телеканал Маскнинг асосий яшаш жойи Лос-Анжелес эканини айтган.
Калифорния АҚШдаги даромад солиғи бўйича энг юқори ставкага эга штат, шунинг учун штаб-квартиранинг кўчиб ўтиши «Маскнинг миллиардлаб долларларини тежаши мумкин», деб ёзади CNBC. Техасда бу кўрсаткич нолга тенг.
Май ойида Маск Калифорниядаги Tesla автомобиль ва бутловчи қисмлари заводи жойлашган Аламида округининг COVID-19 пандемияси туфайли компанияларга жорий қилинган тақиқларни узайтириш ҳақидаги қарорини танқид қилганди. Ҳукумат бу қарорни қабул қилганда, Маск Tesla’нинг штаб-квартирасини бу штатдан Невада ёки Техасга кўчириш билан таҳдид қилди ва ушбу қарор унинг учун охирги чора эканини қўшимча қилди.
Изоҳ (0)