Индонезия Озиқ-овқат маҳсулотлари ва дори препаратлари назорати агентлиги (BPOM) Хитой—Ўзбекистон ҳамкорлигида ишлаб чиқарилган ZF-UZ-VAC2001 вакцинасидан фавқулодда фойдаланишга рухсат берди. Бу ҳақда BPOM раҳбари Пенни К. Лукито шу муносабат билан ташкил этилган матбуот анжуманида маълум қилди, деб хабар бермоқда «Вакцинауз» Telegram канали.
Пенни К. Лукито мазкур вакцинанинг I, II ва III фаза тадқиқотлари унинг ножўя таъсирлари камлигини кўрсатганини маълум қилди. Шунингдек, вакцинанинг 3-дозасидан кейин 7 кун ўтгач, самараси 81,71 фоизни ташкил этгани қайд этилган.
ZF-UZ-VAC2001 вакцинасининг III фаза синовлари Индонезиянинг Бандунг шаҳрида ўтказилган бўлиб, унда жами 4000 нафар кўнгилли иштирок этган. Жами синовларда бутун дунёдан 28 минг нафар кўнгилли қатнашган.
«Индонезия ОАВларида хабар берилишича, ZF-UZ-VAC2001 вакцинаси COVID-19 вирусига қарши умумий 92,92 фоиз самарадорликни кўрсатган. Индонезияда шу пайтгача Bio Farma, Moderna, Pfizer, AstraZeneca, Sinopharm, up CanSino каби вакциналар қўлланган», — дейилади хабарда.
Маълумот учун, ZF-UZ-VAC2001 вакцинаси Хитой Фанлар академияси Микробиология институти ҳамда Ўзбекистон Инновацион ривожланиш вазирлиги ҳузуридаги Илғор технологиялар маркази ва ССВ Вирусология илмий-тадқиқот институти билан ҳамкорликда Zhifei Longcom Biopharmaceutical компанияси томонидан яратилган. Мазкур вакцина III фаза клиник синовлари натижаларига кўра, 3-дозадан сўнг вакцинанинг самарадорлиги барча штаммлар учун умумий 81,76 фоиз, «британча» штаммга қарши эса 92,93 фоизни ташкил этган.
Мавзуга доир:
Изоҳ (0)