Гонконгдаги вазият Пекин ташаббуси билан қабул қилинган миллий хавфсизлик тўғрисидаги қонун туфайли барқарорлашгани маълум қилинди

Гонконгдаги вазият Пекиннинг ташаббуси билан қабул қилинган Миллий хавфсизлик тўғрисидаги қонун туфайли барқарорлашди. Бу ҳақда маҳаллий маъмурият раҳбари Кэрри Ламнинг Қонунчилик кенгашидаги йиллик нутқига таяниб «ТАСС» хабар берди.

«Миллий хавфсизлик тўғрисидаги қонун ва ‘Гонконгни ватанпарварлар бошқаради’ тамойили билан ҳимояланган ‘бир мамлакат, икки тизим’ формуласига амал қилган ҳолда, махсус маъмурий ҳудуд ўз йўлига тушиб олди», — деди ҳудуд раҳбари.

Унинг таъкидлашича, икки йил олдин унинг парламентдаги шундай нутқи Хитойга қарши бўлган қонунчилар томонидан тўхтатилган. Улар тартибсизлик чиқариб, ҳукуматга путур етказмоқчи бўлган. «Бугун мен сизнинг олдингизда хотиржамлик билан гапира оламан, барча депутатлар эса ўз конституциявий бурчларини тўғри бажариш имкониятига эга», — деди Лам.

Ҳудуд раҳбарининг сўзларига кўра, «Гонконгнинг узоқ муддатли фаровонлиги ва барқарорлиги учун ҳар бир фуқаро бир мамлакат, икки тизим тамойилини яхшироқ тушуниши, миллий хавфсизликни ҳимоя қилишга содиқ ҳолда, мамлакат тараққиёти ва Хитой миллий ўзига хослиги билан фахрланиши лозим».

«Сўнгги икки йил ичида Гонконг мисли кўрилмаган сиёсий қийинчиликларга дуч келди, бу эса миллий хавфсизликни хавф остига қўйди», — деди Лам. Унинг сўзларига кўра, ўтган ёзда миллий хавфсизликни ҳимоя қилиш тўғрисида қабул қилинган қонун «кенг кўламли тўс-тўполон содир бўлган шаҳарда тартибсизликни ўз вақтида бартараф этишга имкон берди» ва сайлов тизимини ислоҳ қилишнинг «Гонконг ватанпарварлари томонидан бошқарилишини таъминлади».

Минтақа раҳбари таъкидлашича, марказий ҳукумат Гонконгга юқори даражадаги мустақилликни кафолатлайдиган «бир мамлакат, икки тизим» концепциясига содиқлигини намойиш этди.

Кэрри Лам ўз маърузасида ушбу махсус маъмурий минтақада миллий хавфсизликни мустаҳкамлашга қаратилган қонунчилик ҳаракатларини давом эттириш, хусусан, асосий қонун (Конституциянинг аналоги)нинг  23-моддаси қабул қилинишига кўмаклашиш зарурлигини таъкидлади. Унинг сўзларига кўра, Гонконг маъмурияти ёш авлодни ватанпарварлик руҳида тарбиялаш ва ўқитишда ватанпарварлик тарбиясини кучайтириш заруратидан келиб чиқади. Ламнинг парламентдаги чиқишида асосий эътибор минтақанинг ижтимоий-иқтисодий вазифаларига, хусусан, уй-жой муаммосини ҳал қилишга қаратилди.