Агар Эрон ўзининг ядровий дастури бўйича Қўшма ҳаракатлар режасига дипломатия йўли билан қайтмаса, АҚШ бошқа чораларни кўриши мумкин. Бу ҳақда АҚШ президентининг миллий хавфсизлик бўйича ёрдамчиси Жейк Салливан Оқ уйда бўлиб ўтган Америка—Исроил стратегик маслаҳат гуруҳининг навбатдаги йиғилишида маълум қилди.
«Салливан АҚШ президенти Байденнинг Исроил хавфсизлиги ва Эрон ҳеч қачон ядровий қуролга эга бўлмаслиги борасидаги асосий мажбуриятларини таъкидлаб ўтди. Салливаннинг маълум қилишича, АҚШ маъмурияти дипломатияни бунга эришишнинг энг яхши воситаси деб ҳисоблайди, президент агар дипломатия муваффақиятсизликка учраса, Қўшма Штатлар бошқа вариантларга таянишга тайёрлигини аниқ қилиб билдирган.» — дейилади Оқ уй Миллий хавфсизлик кенгаши вакили Эмили Хорннинг йиғилиш якунлари бўйича ёзма баёнотида. У қандай вариантлар муҳокама қилинаётганини айтмади.
«Томонлар минтақа хавфсизлиги ва барқарорлигига таъсир кўрсатадиган энг долзарб масалалар юзасидан фикр алмашди, шунингдек, Исроилга ва минтақавий ҳамкорларга таҳдидларга қарши курашиш учун умумий қатъийлик билдирди», — дея қўшимча қилди Хорн.
Унинг сўзларига кўра, Қўшма Штатлар ва Исроил «очиқ ва конструктив мулоқотни давом эттиришга, Исроил миллий хавфсизлигига, қолаверса, минтақавий барқарорликка таъсир этувчи ҳаётий масалалар бўйича идоралараро гуруҳлари ўртасида яқин мувофиқликни чуқурлаштиришга келишиб олди».
Аввалроқ АҚШ Давлат котиби Энтони Блинкен ядровий битим бўйича қарор қабул қилиш навбати Эронда қолганини, аммо АҚШ уни узоқ кутмаслигини айтганди.
«Улар (эронликлар) уч ойдан буён музокара ўтказмади. Уларда сайловлар бўлиб ўтди, янги ҳукумат тузилди, лекин улар музокараларни давом эттирмади. Демак, ҳалигача қарор қабул қилинмаган ва тўп улар томонда қолмоқда, лекин бу узоқ давом этмайди », — деди Блинкен.
Апрель ойидан буён Вена шаҳрида Эрон ва халқаро «бешлик» (Россия, Буюк Британия, Германия, Хитой ва Франция) ўртасида Эрон ядровий битимини асл шаклида тиклаш бўйича музокаралар олиб борилмоқда. Томонлар Американинг Ислом Республикасига қўйган санкцияларини бекор қилиш, ядровий соҳадаги мажбуриятларини бажариш, шунингдек, АҚШнинг битимга қайтишини муҳокама қилмоқда.
Шартномага аъзо давлатлар вакиллари, шунингдек, Эрон иштирокисиз Америка элчилари билан алоҳида маслаҳатлашувлар ўтказмоқда. Дастлаб делегациялар ишни май ойининг охирида, кейин июнь ойининг бошида якунлашга умид билдирганди. 21 сентябрь куни Эрон Ташқи ишлар вазирлиги матбуот котиби Саид Хатибзоданинг айтишича, ядровий битимни тўлиқ қайта тиклаш бўйича музокаралар бир неча ҳафта ичида Венада қайта бошланади.
Изоҳ (0)