Лондонда 6 октябрга ўтар кечаси кучли ёмғир ёғиб, оқибатда сув тошқини юз берди ва бир нечта метро линиялари ёпилди.
itvNEWS нашрининг ёзишича, Лондоннинг нуфузли тумани ҳисобланган Найтсбриж, айниқса, катта зарар кўрган. Автомобильлар ва жамоат транспортлари сув кечиб ҳаракатланишга мажбур бўлган. Сув тошқини туфайли бир қанча автомобиль йўллари ёпилган.
Метеорологларнинг маълумотларига кўра, Лондон туманларидан бирига бир соат ичида 26 миллиметр ёғингарчилик тушган.
Шу ҳафта бошида Италияда об-ҳаво кескин ёмонлашиб, кучли ёмғир, момақалдироқ ва қаттиқ шамол бошланганди. Мамлакатнинг Фуқаролик мудофаа хизмати қарорига биноан, учта шимолий вилоят — Лигурия, Ломбардия ва Пемонтнинг бир қатор туманларида метеорологик хавфнинг «қизил» (энг ёмон) даражаси эълон қилинди. 4 октябрь куни Лигуриянинг Савона провинциясига, шунингдек, Генуя яқинига рекорд даражадаги ёғингарчилик (тахминан, 500 мм) тушган, бунинг оқибатида кичик дарёлар қирғоқларидан тошиб кетиб, бир неча аҳоли пунктларини сув босган.
Шунингдек, Уммон ва Эронга кучли «Шоҳин» тропик циклони урилиб, 13 киши табиий офат қурбонига айлангани ҳақида хабар берилганди. Қайд этилишича, Уммоннинг шимолий қирғоғида кенг кўламли сув тошқини содир бўлган. Кучли ёмғир ёғиб, шамол тезлиги соатига 150 километргача етган. Шимолий ал-Батина провинциясида 7 киши ҳалок бўлган, яна тўрт киши кўчкилар оқибатида чўкиб кетган ёки ҳалок бўлган. Эронда икки балиқчининг жасади топилган. Яна уч нафар балиқчи бедарак йўқолган.
Изоҳ (0)