«Ижтимоий ҳимояга муҳтож ёшларни қўллаб-қувватлашнинг қўшимча чора-тадбирлари тўғрисида»ги ҳукумат қарори қабул қилинди, деб хабар беради Telegram’даги «Ҳуқуқий ахборот» канали.
Қарор билан меҳрибонлик уйлари, болалар шаҳарчалари ва оилавий болалар уйларида тарбияланган ҳамда «ёшлар дафтари»га киритилган ёшларни қўллаб-қувватлашга доир қуйидаги вақтинчалик тартиблар тасдиқланган:
- ушбу ёшларга автомототранспорт воситалари ҳайдовчиларини тайёрлаш курсларида ўқиш харажатларини компенсация қилиши бўйича – БҲМнинг 4 бараваригача (1 миллион 80 минг сўм) компенсация берилади;
- сафарбарлик чақирувчи резервидаги хизматни ўташ бадалини қоплаш бўйича.
Бунда мазкур харажатларнинг 50 фоизи компенсация қилиниши назарда тутилган.
Бундан ташқари, қарор билан «ёшлар дафтари»га киритилган ёшларнинг хорижий тиллар ва умумтаълим фанлари бўйича нодавлат таълим ташкилотларида ўқиш харажатларининг бир қисмини ҳамда улар бўйича миллий сертификатлар олиш учун ўтказиладиган имтиҳонларни топшириш харажатларини қоплаб бериш тартиби белгиланган.
Бундан аввал Ўзбекистонда 18 ёшга тўлган етим болаларга 1 хонали уй ажратилиши белгилангани, Тошкентда илк маротаба оилавий болалар уйи ташкил қилингани ҳамда Ўзбекистонда ногиронлиги бўлган болаларни қўллаб-қувватлаш учун бюджетдан 100 миллиард сўм ажратилиши ҳақида хабар берилганди.
Изоҳ (0)