Қашқдарё вилояти Халқ таълими бошқармаси ижтимоий тармоқларда Шаҳрисабздаги 58-мактабда ўқувчилар поли чириб кетган спортзалда шуғулланаётгани юзасидан тарқалган хабарларга муносабат билдирди.
«Kun.uz»нинг Қашқадарё вилоятига оид янгиликларни ёритиб борувчи Telegram каналида Шаҳрисабздаги мактаблардан бирида ўқувчилар поли чириб кетган спортзалда шуғулланаётгани ҳақида суратлар эълон қилинди.
Қашқадарё ХТБнинг маълум қилишича, мазкур ҳолат вилоят халқ таълими бошқармаси ахборот хизмати раҳбари ва тегишли масъуллар иштирокида ўрганилмоқда.
Маълумотларга кўра, Шаҳрисабз тумани халқ таълими бўлимига қарашли 58-умумий ўрта таълим мактаби «Ғилон» МФЙга қарашли Ғилон қишлоғида жойлашган. Мактаб 1967 йил қурилган ва 2014 йилда 200 ўринли янги ўқув биноси барпо этилган. Мавжуд 2 та 240 ўринли ўқув бинолари мукаммал таъмирланган.
2019 йилда мактаб филиалига Инвестиция давлат дастури асосида 96 ўринли ўқув биноси қурилган. Жами қуввати бугунги кунда 776 ўқувчи ўринли, ўқувчилар сони 557 нафар, навбатлилик коэффициент 0,7 фоиз ва мактабнинг умумий ер майдони 1,75 гектарни ташкил этади.
«Мактабнинг 12х24 метр ўлчамдаги спорт зали 2007 йил қурилган. Мактаб тоғли ҳудудда жойлашгани, ерости сувлари ер юзасига яқинлиги, намгарчилик юқорилиги натижасида спорт залининг пол қисми жуда тез вақтда яроқсиз ҳолатга келган», — дейилади муносабатда.
Таъкидланишича, 2022 йил «Маҳаллий бюджет» ҳисобидан мактаб спорт залининг пол қисми янгидан таъмирлаш режалаштирилган.
Изоҳ (0)