Қизиқчи ва сўз устаси Валижон Шамшиев Тошкент шаҳри Яшнобод тумани «Баркамол авлод» болалар мактаби директори лавозимига тайинланди. Бу ҳақда Республика «Баркамол авлод» болалар мактаби матбуот хизмати хабар берди.
«Ҳаммамизнинг мақсадимиз битта — Ўзбекистон келажагини янада гуллатиб яшнатиш ва унинг учун фарзандларимизни тарбиялаш. Фарзандлар тарбиясида қўлимдан келганча сизлар билан биргаликда хизмат қиламан», — дея ўз хизмат вазифасига киришди санъаткор.
Таъкидланишича, тайинлов Халқ таълими вазирлиги хулосаси асосида амалга оширилган.
Маълумот учун 2019 йилнинг октябрида Президент қарорига мувофиқ, Халқ таълими вазирлиги тасарруфидаги «Баркамол авлод» республика ва ҳудудий болалар марказлари негизида Республика ва ҳудудий «Баркамол авлод» болалар мактаблари ташкил этилган эди. «Баркамол авлод» болалар мактабларида 2020/2021-ўқув йилидан бошлаб «STEAM — таълим» дастури жорий этилиши белгиланган.
Аввалроқ Самарқанд шаҳар маданият бўлимига санъатшунослик фанлари номзоди, қизиқчи, «Ҳандалак» гуруҳи аъзоси Ортиқ Султонов бошлиқ вазифасини бажарувчи этиб тайинлангани тўғрисида хабар берилганди. Шунингдек, Ўзбекистон давлат филармонияси Фарғона вилоят бўлимига хонанда Отабек Мамазоитов раҳбар этиб тайинланганди.
Изоҳ (0)