Сирдарё вилоятининг Боёвут тумани ҳокими туманнинг турли ҳудудларидаги 866 дона қуриб қолган дарахтларни оммавий равишда кесишга рухсат бергани ҳақидаги хабарлар кескин танқидларга сабаб бўлгач, туман ҳокимлиги матбуот хизмати бунга изоҳ берди.
Унда айтилишича, 2 йилдан буён вилоят бўйлаб «Бир миллион дарахт» акцияси ўтказилиб, акция доирасида туман-у шаҳарларда кўплаб манзарали дарахт кўчатлари экилиб, парвариш қилиб келинмоқда. 2021 йилда ҳам Боёвут туманида ушбу акцияни давом эттириш учун тайёргарлик олиб борилмоқда.
2021 йилнинг май—июль ойларида масъул ташкилотлар ҳамда Сирдарё вилояти Экология ва атроф-муҳитни муҳофаза қилиш бошқармаси иштирокида ўтказилган ўрганиш давомида жами 869 туп қуриган дарахт, шундан 828 туп баҳорда экилиб, қуриган кўчатлар аниқланган.
Шу сабабли кузги кўчат экиш мавсумигача ушбу кўчатлар ўрнини янгиси учун тайёрлаш режалаштирилган.
Сирдарё вилояти Экология ва атроф-муҳитни муҳофаза қилиш бошқармаси ахборот хизмати хабарига кўра, тегишли тартибда ўрганишлар олиб борилганда, жами экилган 9 турдаги 5371 дона манзарали дарахт кўчатидан 828 донаси табиий иқлим таъсирида қуриб қолгани аниқланган.
Шу сабабли уларнинг ўрнини янги кўчатлар экиш шарти билан қуриган кўчатларни олиб ташлашга рухсат берилган.
«Шу ўринда фаол журналист ва блогерлардан ушбу масалани нотўғри талқин қилишдан тийилишга чақириб қоламиз», — дейилади ҳокимлик хабарида.
Мавзуга доир:
- Сурхондарёда туман ҳокимининг ер ажратиш бўйича қарори билан тут дарахтларини кесиб ташлаб, 31 млн сўм зарар келтирган шахс 1,3 млн сўм жаримага тортилди
- Тошкент шаҳар прокуратураси биноси олдида дарахтлар туман ҳокимининг қарори билан кесилгани маълум бўлди
- Расул Кушербаев: «Деновда 109 туп дарахтнинг ноқонуний кесилиши юзасидан нега жиноят иши қўзғатилмади?»
- «Амирсой» курорт зонасида 700 туп атрофида қимматбаҳо дарахтлар кесиб ташлангани бўйича жиноят иши қўзғатилди
Изоҳ (0)