«Бировга буюм сингари эгалик қилишни исташ — бемаънилик». 57 ёшни қаршилаган Моника Белуччи ҳақиқатлари

Ижро маҳорати, назокати ва жозибаси билан замонавий киносаноатда ўз ўрнига эга италиялик актриса Моника Белуччи 57 ёшга тўлди.

Бўлажак актриса 1964 йили Читта-ди-Кастелло шаҳрида дунёга келган. Болалигидан адвокат бўлишни орзу қилган Моника ўқишга пул топиш учун кичик тамаддихоналардан бирида официант бўлиб ишлай бошлаган. Соҳибжамоллиги эътибордан четда қолмаган Белуччи 16 ёшиданоқ моделлик оламига қадам қўяди. Охир-оқибат у судларда қатнашишдан кўра, халқаро подиумларда чиқишни афзал билади. Адвокатликдан воз кечиб, шон-шуҳрат бағрига отилади. Шунга қарамай, у ҳар икки касб ҳам бир-бирига ўхшаш, деган фикрда. «Адвокатлардан-да қойилмақом актёр йўқ. Тасаввур қилиб кўринг-а, улар ҳар куни роль ижро қилиши керак. Суд зали ва суратга олиш майдончаси ўртасида унчалик катта фарқ йўқ, ахир», — дейди у.

Моделлик кино оламига ташриф қоғози бўладию, юздан ортиқ картиналарда катта-кичик ролларга йўл очади. Моника шу чоғгача турли оламга мансуб аёллар образини гавдалантиришга муваффақ бўлган. Қаҳрамонлари бетакрор, турли ижтимоий синф ва табақага мансублигига қарамай, уларнинг барида ўзига хос умумийлик — жозиба, аслзодаларга хос қараш ва нафислик мужассам. Актриса сифатида илк бор 1990 йилда кўриниш берган ва бугунги кунга қадар икки карра «Олтин глобус» ҳамда «Кумуш тасма» мукофотини қўлга киритган Моника Белуччининг ҳаётий ҳақиқатларини тақдим этамиз.