Дениел Крейг Бонд ролини ижро этган сўнгги картинанинг премьераси муносабати билан Ян Флемингнинг романларида тасвирланган бош қаҳрамон ролини ижро этган актёрлар рейтингига тўхталиб ўтамиз.
Еттинчи ўрин — Жорж Лезенби
Австралиялик актёр Жеймс Бонд ҳақидаги фильмнинг атиги биттасидагина — 1969 йили экран юзини кўрган «Ҳазрати олияларининг махфий хизматида» (On her majesty’s secret service) суратга тушган. Қизиғи, бу Жоржнинг дебют роли ва суратга олиш майдончасидаги илк тажрибаси бўлган. Жеймс Бонд ҳақида ўйлаганимизда унинг исми энг охирги бўлиб хаёлимизга келишининг сабаби ҳам бежиз эмас. Лезенбининг ҳам ўзига яраша мухлислар бор эканини инкор қилиб бўлмайди, аммо уларнинг сони Бондни гавдалантирган бошқа актёрлардан сезиларли даражада кам.
Олтинчи ўрин — Дэвид Нивен
Жорж сингари машҳур жосус ҳақидаги фильмлардан биттасида кўриш мумкин эканлиги боис Дэвид ҳам мазкур рейтингдаги сўнгги ўринга лойиқ топилган. Нивен 1967 йилда суратга олинган «Казино Роял» (Casino royale)да ёши ўтиб қолган, истеъфодан кейин ишга қайтган Бонд ролини ижро қилган. Фильм IMDb рейтингида паст натижа (атиги 5.1) қайд қилганига қарамай, Нивен ҳамкасби Жорж Лезенбидан машҳурроқ саналади.
Бешинчи ўрин — Тимоти Далтон
Ҳар ойда Жеймс Бонд ролидаги Тимоти Далтон қидирув тизимларида 49 500 марта қидирилади, Википедиядаги саҳифага ташрифларнинг умумий сони эса деярли 7,5 миллионни ташкил қилади. 1987-1989 йиллар оралиғида у жосус 007 ҳақидаги иккита фильм: «Кўз чақнаши» (The living daylights) ва «Қотиллик учун рухсатнома» (Licencе to kill)да суратга тушган. Аксарият мухлислар Далтон гавдалантирган Бонд образини Ян Флемингнинг романларидаги қаҳрамонга яқинроқ деб ҳисоблайди.
Тўртинчи ўрин — Рожер Мур
Рейтингнинг тўртинчи ўрнида Рожер Мурни кўриш мумкин У Бонд ҳақидаги фильмларнинг 1973 йилдан 1985 йилгача чиққан 7 та қисмида суратга тушган. «Яша ва ўлишга қўйиб бер» (Live and let die), «Тилла тўппончали одам» (The man with the golden gun), «Мени севиб қолган жосус» (The spy who loved me), «Ой пойгачиси» (Moonraker), «Фақат сенинг кўзларинг учун» (For your eyes only), «Саккизоёқ» (Оctopussy) ва «Қотиллик кўриниши» (А view to a kill)) картиналарида бош қаҳрамонни гавдалантирган. Мухлислар қалбидан жой олишининг сабаби ролга ҳазилкашлик билан ёндашиб, қаҳрамонига ўзига хосликни бахш этгани бўлган. Масалан, унинг ижросидаги Бонд ҳеч қачон машҳур мартинига буюртма бермаган.
Учинчи ўрин — Пирс Броснан
Актёрнинг Википедиядаги саҳифаси (ойига 110 минг марта қидирилишини ҳисобга олмаганда) сал кам 18,5 миллион марта кўрилган. Броснан 1995—2002 йиллар оралиғида Жеймс Бонд ҳақидаги 4 та фильм, хусусан, (Golden eye) ва «Ҳалок бўл, лекин ҳозир эмас» (Die another day)ларда суратга тушган. Дидининг нозиклиги ва заковати билан яхши маълум бўлган Броснан энг севимли Жеймс Бондлар рўйхатида учинчи бўлиб туради.
Иккинчи ўрин — Дениел Крейг
Иккинчи ўриндан костюм ва суперкарлар коллекцияси соҳиби Дениел Крейг ўрин олган. Актёр Бонд ҳақидаги фильмлардан бештасида суратга тушган. 2021 йилнинг 30 сентябрида премьераси бўлиши кутилаётган «Ўлиш вақти эмас» (No time to die) фильми шулар жумласидан. У Бондни гавдалантирган фильмлар орасида ҳозирча 2006 йилда суратга олинган «Казино роял» рейтингларда энг юқори натижани билан турибди.
Биринчи ўрин — Шон Коннери
Шон Коннерининг ҳеч иккиланмай ушбу рейтингда етакчилик қилишга арзишини эътироф қилиш мумкин. Ҳар ойда 450 000 одам Google’да у ҳақида маълумот қидиради. Википедиядаги саҳифасига эса 30 миллиондан кўпроқ одам ташриф буюрган. Унинг иштирокидаги «Доктор Ноу», «Россиядан муҳаббат билан» (From Russia with love) сингари фильмлар IMDb порталида Флеминг романларининг энг яхши экранизацияларидан ҳисобланади. Шон ижро маҳорати, истараси ва ўзига хос ёндашув билан мухлислар қалбини забт этган. Жеймс Бонд роли билан машҳурликка эришган Шон Коннери 2020 йил 90 ёшда вафот этган.
Изоҳ (0)