Disney компанияси ва актриса Скарлетт Йоханссон «Қора бева» фильмининг экранларга чиқиши борасидаги юзага келган юридик баҳсга барҳам берди, деб хабар қилади «Korrespondent.net».
Икки ой олдин Йоханссон Disney’ни шартномани бузишда айблаб, судга берганди. Компания актриса иштирокидаги «Қора бева» фильмини кинотеатрлар билан бир вақтда Disney+ сервисида эълон қилиб юборган эди. Юлдузнинг фикрича, бу каби қарор уни каттагина даромаддан қуруқ қолдирган, чунки актрисанинг гонорарини бир қисми кинотеатрларда сотиладиган чипталарга боғлиқ.
Disney ва Йоханссон ўртасидаги битим тафсилотларига ошкор этилмаяпти, аммо томонлар берган изоҳга кўра, улар можарони ҳал этган.
«Мен ‘Қора бева’ борасида Скарлетт Йоханссон билан мутлақ келишувга эришганимиздан хурсандман. Биз унинг Marvel кинематографик оламига қўшган ҳиссасини қадрлаймиз ва келажакдаги лойиҳалар, жумладан, Disney Tower of Terror устида ҳамкорликда иш олиб боришимизни сабрсизлик билан кутиб қоламиз», — дейди Disney Studios’нинг контент бўйича директори Алан Гергман.
Шунингдек, Скарлеттнинг таъкидлашича, у кўнгилочар соҳа гиганти билан юзага келган можарога барҳам берганидан хурсанд.
«Узоқ йиллар давомида биргаликда амалга оширган ишларимиздан бениҳоят фахрланаман ва жамоа билан ижодий муносабатларим менга жуда ёқади», — дейди актриса.
Эслатиб ўтамиз, «Қора бева» лентаси 9 июль кунидан бошлаб кинотеатрлар ва Disney+ да намойиш этилмоқда. Дастлабки дам олиш кунлари давомида картина 218 миллион доллар тўплаган. Бутун дунё бўйлаб касса йиғимлари эса 378 миллион доллардан ошади. Disney маълумотларга кўра, шунингдек, фильм прокатнинг дастлабки 20 куни давомидаги оқимли харидлар сабаб 60 миллион долларга яқин маблағ ишлаган.
Изоҳ (0)