“Birovga buyum singari egalik qilishni istash — bema’nilik”. 57 yoshni qarshilagan Monika Beluchchi haqiqatlari

Ijro mahorati, nazokati va jozibasi bilan zamonaviy kinosanoatda o‘z o‘rniga ega italiyalik aktrisa Monika Beluchchi 57 yoshga to‘ldi.

Bo‘lajak aktrisa 1964-yili Chitta-di-Kastello shahrida dunyoga kelgan. Bolaligidan advokat bo‘lishni orzu qilgan Monika o‘qishga pul topish uchun kichik tamaddixonalardan birida ofitsiant bo‘lib ishlay boshlagan. Sohibjamolligi e’tibordan chetda qolmagan Beluchchi 16 yoshidanoq modellik olamiga qadam qo‘yadi. Oxir-oqibat u sudlarda qatnashishdan ko‘ra, xalqaro podiumlarda chiqishni afzal biladi. Advokatlikdan voz kechib, shon-shuhrat bag‘riga otiladi. Shunga qaramay, u har ikki kasb ham bir-biriga o‘xshash, degan fikrda. “Advokatlardan-da qoyilmaqom aktyor yo‘q. Tasavvur qilib ko‘ring-a, ular har kuni rol ijro qilishi kerak. Sud zali va suratga olish maydonchasi o‘rtasida unchalik katta farq yo‘q, axir”, — deydi u.

Modellik kino olamiga tashrif qog‘ozi bo‘ladi-yu, yuzdan ortiq kartinalarda katta-kichik rollarga yo‘l ochadi. Monika shu chog‘gacha turli olamga mansub ayollar obrazini gavdalantirishga muvaffaq bo‘lgan. Qahramonlari betakror, turli ijtimoiy sinf va tabaqaga mansubligiga qaramay, ularning barida o‘ziga xos umumiylik — joziba, aslzodalarga xos qarash va nafislik mujassam. Aktrisa sifatida ilk bor 1990-yilda ko‘rinish bergan va bugungi kunga qadar ikki karra “Oltin globus” hamda “Kumush tasma” mukofotini qo‘lga kiritgan Monika Beluchchining hayotiy haqiqatlarini taqdim etamiz.