Грузиянинг собиқ президенти Михаил Саакашвили ижтимоий тармоқларда мамлакатга қайтиб келгани ҳақида ёзди.
«Хайрли тонг, Грузия, саккиз йилдан кейин яна Грузиядан салом», — дея Саакашвилининг хабарини келтирган Грузия матбуоти.
Ўз навбатида, Грузия Ички ишлар вазирлиги журналистларга Саакашвилининг Грузия ҳудудида экани ҳақида ҳеч қандай маълумотга эга эмаслигини билдирди.
Аввалроқ собиқ президент ижтимоий тармоқларда Грузияга Киев-Тбилиси рейси билан 2 октябрь куни кечқурун, маҳаллий сайловларда овоз бериш тугагач етиб келиш ниятидалигини ёзган.
Шу билан бирга, ҳукумат вакиллари Саакашвилини уни қамоқхонага кузатиб қўйиш учун кутишаётганини айтган. Грузия прокуратураси Саакашвилини бир нечта жиноий моддалар билан айбламоқда, улардан иккитаси бўйича собиқ президент жазога ҳукм қилинган.
Февраль охирида Михаил Саакашвили Грузия мухолифатини норозиликларни тўхтатмасликка чақиргани ҳақида хабар берилганди, У, шунингдек, Тбилисида «Ягона миллий ҳаракат» мухолиф партия раиси Никанор Мелиянинг ҳибсга олинишини қоралаган. Саакашвилининг айтишича, уни қўлга олганларнинг ўзлари «жуда узоқ вақт қамоқда ўтиради».
Эслатиб ўтамиз, Грузия полицияси 23 февраль куни «Ягона миллий ҳаракат» (ЯМҲ) мухолифат партияси етакчиси Никанор Мелияни ҳибсга олганди. У 2019 йилда тартибсизликлар уюштирганликда ва Грузия парламентига қилинган ҳужумда иштирок этганликда айбланмоқда.
Грузиядаги «Ягона миллий ҳаракат» партияси грузиялик сиёсат арбоби Михаил Саакашвили томонидан ташкил этилган. У партияни бошқариш давомида ҳокимиятга эгалик қилиб келган, аммо 2012 йилги парламент сайловларида партия бизнесмен Бидзина Иванишвили томонидан асос солинган «Грузия орзуси» иттифоқига ютқазган.
Изоҳ (0)