Бу йил Вақф фонди томонидан муҳтож оилаларга 43 та уй қуриб берилди — Мусулмонлар идораси

Жорий йилнинг ўтган даврида Вақф фонди томонидан Ўзбекистондаги муҳтож оилаларга 43 та уй қуриб берилган. Бу ҳақда 21 август куни Мусулмонлар идораси матбуот хизмати хабар берди.

Манбага кўра, фонд фаолиятига оид йиғилишида Вақф томонидан кам таъминланганларни қўллаб-қувватлаш бўйича салмоқли ишлар қилингани айтилган.

“Вақф фонди томонидан амалга оширилган хайрия ишлари ўтган йилнинг шу даврига нисбатан сезиларли ошгани қайд этилиб, уйга муҳтож 43 та оилага ҳомийлар кўмагида тўлиқ жиҳозланган уй қуриб берилган. Жарроҳлик амалиёти, даволаниш ва ногиронлиги бўлган 1200 нафар фуқарога соғлиқларини тиклаш учун моддий ёрдам кўрсатилгани ижобий натижа сифатида баҳоланди”, дейилади хабарда.

Шу билан бирга, манба фонд томонидан ёрдамга муҳтож оилалар фарзандларига ўқув қуроллари тарқатилгани, чекка ҳудудларда қудуқ қазиб, сув чиқариш ишлари бажарилганини ҳам қайд этган. Ўз навбатида ўқув марказлари, тиббиёт муассасалари ва хорижий ҳамкорлар билан яхши алоқа йўлга қўйилганига ҳам тўхталган.

Йиғилишда олдинда турган муҳим вазифа Вақф мулкларини шакллантириш ва янгиларини харид қилиш экани келтирилган. Фонд марказий аппарати ва ҳудудий филиаллар штат жадвалларини қайта шакллантириш, халқаро алоқаларни ривожлантириш зарурлиги ҳам билдирилган.

Фонд расмий сайтида кунлик хайрия маблағлари тушумлари миқдори кўрсатиб борилади. “Дарё” ҳисоб-китобларига кўра, жорий йил бошидан 21 августгача фондга 23,2 миллиард сўм хайрия қилинган.