Америкаликлар мамлакатдаги демократия хавф остида деб ҳисобламоқда

Reuters агентлиги 4 446 нафар катта ёшли америкаликни қамраб олган ижтимоий сўровнома ўтказди. Сўровнома Америка Қўшма Штатларида бўлинишлар ортиб бораётганини кўрсатди.

Reuters сўровномасида қатнашган америкаликларнинг 57 фоизи демократия хавф остида деб ҳисоблашини айтган. Демократларнинг ҳар 10 нафаридан 8 нафари айнан эркинлик борасида хавфлар бор деб ҳисоблаган бўлса, амалдаги президент Дональд Трампнинг республикачиларидан ҳар 10 кишидан 4 киши худди шундай жавоб берган.

Манбага кўра, олти кун давом этган сўровномада 4 446 нафар катта ёшли америкалик иштирок этган. Сўровлар Вашингтондаги сиёсий бўлинишларни очиб берган. Бу ерда республикачилар АҚШ Конгрессининг иккита палатасини ҳам назорат қилмоқда. Шунингдек, яна кўпчилик штатларда ҳам республикачилар ҳукумронлик қилмоқда.

Техас ва Калифорния губернаторларининг қайта округлаштириш (герримандеринг — сайловчиларни кўпайтириш учун чегараларни ўзгартириш) режаларини сўровда қатнашганларнинг 55 фоизи, жумладан демократларнинг 71 фоизи ва республикачиларнинг 46 фоизи, “демократия учун зарарли” деб баҳолаган.

Трампнинг даъвати билан Техаснинг республикачи губернатори Грег Абботт штат қонунчилик органининг махсус сессиясини чақирди. У 2026 йилги оралиқ сайловлар арафасида штатнинг конгресс харитасини қайта чизиш орқали республикачиларга Вакиллар палатасидаги 219-212 ўринли устунликни сақлаб қолишда ёрдам бермоқчи.

Қайд этилишича, АҚШ Конгрессига ўтказиладиган оралиқ сайловларда амалдаги президентнинг партияси кўпинча ютқазади. Бу эса Трампнинг амалдаги режаларини бажаришга ҳалақит беради. Конгрессда демократларнинг кўп бўлиши Дональд Трамп учун ёмон. У биринчи муддатида икки марта импичмент терговларига олиб келинган.

Калифорния губернатори, демократ Гавин Ньюсом Техаснинг режаларига қарши туришга ҳаракат қилмоқда. Гавин Калифорния округларининг чегараларини қайта чизиб, демократларга Конгрессда қўшимча бешта ўрин олиб келмоқчи. Ньюсом 2028 йилги президентлик сайловларида Демократлар партиясининг номзоди бўлмоқчи.

Таъкидланишича, президент сифатида Трамп ҳам демократия меъёрларини четлаб ўтган. Бунга АҚШ Адлия вазирлигига сиёсий рақибларини таъқиб қилишни буюриш, мустақил Федерал Резервни фоиз ставкаларини пасайтиришга мажбурлаш ва Вашингтон полициясини назоратга олиш кабилар киради.

Сўровда қатнашган Техас республикачилари кўпчилиги штатнинг қайта округлаштириш режасини қўллаб-қувватлаган. Демократлар эса буни алдов деб атади. Демократик штатлар ҳам шундай жавоб қайтариш ғоясини маъқуллади.

Шунингдек, демократларнинг 46 фоизи ўз партияси йўлидан адашган деб ҳисоблайди. Республикачиларнинг 19 фоизи партиянинг нотўғри йўлдан кетаётганини айтган. Сўровнома плиус-минус 3 фоизгача хато бўлиши мумкин.