Янги таҳлилларга кўра, электрон сигарета — вейп чекадиган болалар кейинчалик оддий сигарета чекувчига айланиш эҳтимоли юқори бўлади. Бундай болаларда астма касаллиги ва руҳий саломатлик билан боғлиқ ўзгаришлар кўпроқ учрайди, деб хабар берди South China Morning Post.
Ёшлар орасида вейпинг бўйича ўтказилган энг йирик глобал тадқиқот натижаларига кўра, вейп чекиш нафас йўллари касалликлари, спиртли ичимлик ва марихуана истеъмол қилиш каби зарарли одатларга берилиш хавфини ҳам оширади.
Буюк Британиянинг Йорк университети ва Лондон гигиена ва тропик тиббиёт мактаби (ЛШТМ) олимлари ёшлар орасидаги электрон сигареталар бўйича мавжуд барча илмий ишлар таҳлил қилди. Бу кенг қамровли таҳлил бўлиб, 384 та тадқиқот асосида тайёрланган 56 та таҳлилни қамраб олди. Шундан 21 таси ёшлар орасида электрон сигарета чекиш ва кейинчалик оддий сигаретага ўтиш масаласини ўрганган.
Мутахассисларнинг айтишича, вейп чеккан ёшлар нафақат кейинчалик сигарета чекувчи бўлиши, балки буни кўпроқ чекишга мойиллиги юқори бўлади. Ёшлар орасидаги вейпинг пневмония, бронхит, олигоспермия, астма, бош айланиши, бош оғриғи ва мигрен каби касалликлар авж олишига сабаб бўлади. Шунингдек, депрессия ва ўз жонига қасд қилиш фикрлари ҳам айнан электрон сигарета чекувчиларда кўпроқ учрайди.
Йорк университети соғлиқни сақлаш фанлари бўйича доценти Су Голдер шундай деди:
“Турли мамлакатлардан олинган таҳлилларнинг барчаси деярли бир хил натижа кўрсатиши жуда ҳайратланарли. Кўплаб тадқиқотларда электрон сигарета чеккан ёшлар келажакда доимий чекувчига айланиш эҳтимоли юқори бўлишини кўрсатмоқда. Бу натижалар ўсмирларни вейпнинг хавфидан ҳимоя қилиш учун қатъий чораларни қўллашни талаб қилади”.
Тадқиқотнинг етакчи муаллифларидан бири, ЛШТМ доценти Ребекка Гловер қўшимча қилди:
“Электрон сигареталар ёшларнинг соғлиғига жиддий зарар етказмоқда ва у бошқа зарарли моддалар истеъмол қилиш учун ъэшикъ вазифасини бажармоқда”.
Шу сабабли кўплаб давлатлар бир марталик вейпларни чеклаш ёки бутунлай тақиқлаш чораларини кўряпти. Жумладан, Ўзбекистон Олий Мажлис Қонунчилик палатасининг 24 январдаги мажлисида электрон сигареталарни бутунлай тақиқлаш кўзда тутилган қонун лойиҳаси учинчи ўқишда қабул қилинди.
Ушбу қонун лойиҳаси билан Ўзбекистонда никотинни истеъмол қилиш мосламалари, шу жумладан электрон сигареталар ва улар учун суюқликларнинг муомаласи (ишлаб чиқариш, тайёрлаш, сақлаш, ташиш ёки ўтказиш, Ўзбекистон ҳудудига олиб кириш, олиб чиқиш) тақиқланган.
Бундан ташқари, айланмаси тақиқланган чекилмайдиган тамаки маҳсулотлари, никотинни истеъмол қилиш мосламалари, шу жумладан электрон сигареталарни қонунга хилоф равишда муомалага киритиш билан боғлиқ ҳуқуқбузарликлар учун жавобгарлик белгиланган.
Изоҳ (0)