Хитой бозорида арзон электрокар турлари тобора ортиб бормоқда. Маҳаллий Hongrui компанияси Xiaohu Tiger номли оилавий электрокар учун буюртмалар қабул қилишга тайёрланяпти. Икки ёки тўрт ўриндиққа эга бўладиган машина нархи 4600 доллардан бошланади, деб хабар беради Motor.
Xiaohu электрокари ташқи кўриниши билан «Tesla қотили» номини олган бошқа бир машинани — Wuling Hogguang Mini EV’ни ёдга солади. Митти модель маҳаллий бозорда савдолар рекордини янгиламоқда: август ойида унинг 41 188 нусхаси сотилган. Афтидан Wuling’нинг муваффақияти Hogrui компаниясини илҳомлантирган, чунки дизайнидан ташқари моделнинг ўлчамлари, босиб ўтиш масофаси ва нархи ҳам ўхшаш.
Икки ўриндиқли Hongrui Xiaohu узунлиги уч метрга, беш ўриндиқлиники эса 3,4 метрга етади, ғилдираклар базаси мос равишда 1980 ва 2440 миллиметр. Катта электрокар юкхонасининг максимал сиғими 681 литрга тенг.
Қўшимча жойга эга бўлиш учун салондан марказий тоннель олиб ташланган, олд панелга мультимедиа тизими жойлашган экран ва қурилмалар ўрнатилган. Улар қаршисида — бошқарув элементларисиз уч кегайли руль, марказда трансмиссияни бошқарув тугмалари жойлашган.
Машина нархи арзон бўлишига қарамай, ўрнатиладиган жиҳозлар у қадар «қашшоқ» эмас: улар орасидан орқани кўришга мўлжалланган камера, иккита фронтал хавфсизлик ёстиқчаси, шиналардаги бозимни мониторинг қилиш тизими ва тормоз кучланишини тақсимлайдиган тизим ўрин олган. Бундан ташқари, спорт ва тежамкор режимда ҳаракатланиш имконияти ҳам мавжуд.
Xiaohu’нинг электродвигатели битта: у 41 от кучини тақдим этади ва 11,8 киловатт/соатли аккумулятордан қувватланади. Бир марта қувватланиш орқали машина NEDC цикли бўйича 170 километр йўл боса олади. Моделнинг беш эшикли версиясига 46 от кучига эга мотор ўрнатилган, бироқ батарея энергияси 160 километрга етади.
Hongrui Xiaohu Tiger’нинг биринчи партиясидан 500 нусха ўрин олган бўлиб, буюртмалар октябрдан қабул қилинади.
Аввалроқ Alibaba онлайн савдо майдончасида бир кишини ташишга мўлжалланган митти электромобил сотувга қўйилгани тўғрисида хабар берилганди. Ўлчамининг кичиклигига қарамай, машина умумий фойдаланишдаги йўлларда ҳаракатланиш имконини берадиган зарур қурилмалар билан жиҳозланган. Жамланмасидан келиб чиқиб Хитой электромобилининг нархи 100 доллардан 4 минг долларгача бўлиши мумкин.
Изоҳ (0)