Tesla акцияларининг қимматлашиши туфайли Маскнинг бойлиги 27 сентябрь куни 3,8 миллиард долларга ўсиб, бозор якунида 203,4 миллиардни ташкил этгани тўғрисида хабар берилганди. Esquire’нинг ёзишича, шу муносабат билан Маск Amazon ва Blue Origin раҳбари Жефф Безосга 2 рақами туширилган улкан ҳайкал ва кумуш медални юборган.
Forbes рейтингида иккинчи поғонага тушиб қолган Безос посилка олганини маълум қилмаган. Унинг вакили эса журналининг бу борада сўраган изоҳига жавоб қайтармаган.
Ҳозирда Маскнинг бойлиги 200,3 миллиард долларни, Безосники эса 193,1 миллиард долларни ташкил этмоқда. Илон Маск бойлиги 200 миллиард доллардан ошган тарихдаги учинчи инсонга айланди. Биринчи бўлиб, 2020 йилнинг августида Безоснинг бойлиги ушбу кўрсаткичга етганди, орадан бир йил ўтгач ҳозирда 176,9 миллиард доллар билан рейтингнинг учинчи поғонасидан ўрин олган LVMH президенти Бернар Арнонинг бойлиги 200 миллиард доллардан ошганди.
Илон Маск Жефф Безосни биринчи бор 2021 йил январида ортда қолдириб, дунёдаги энг бой инсонга айланган эди. Кейинроқ иккинчи ўринга, май ойида эса Bloomberg Billionaires Index версиясига кўра, учинчи ўринга тушиб қолганди. Amazon асосчиси ушбу номни 2017 йилдан буён ўзида сақлаб келаётганди. 2020 йил бошида Маск энг бадавлат инсонлар рейтингининг энг охирги поғонасини эгаллаганди, аммо бир йил ичида унинг бойлиги тахминан 150 миллиард долларга ошди.
Изоҳ (0)