Америкалик аёл жароҳат олган капалакка «протез» қанот ясади (видео)

Далия исмли аёл қаноти шикастланган капалак учун патдан «протез» ясади. Аёл ҳашаротни қутқариш жараёни тасвирланган видеолар сериясини TikTok’да эълон қилган, деб хабар беради «Korrespondent.net».

Уйида қанотига шикаст етган капалакни топиб олган Далия бир неча кун давомида уни сув ва асалдан тайёрланган нектар билан боққан, шундан кейин, унинг учиши учун ёрдам бериш йўлини топган.

Аёл дўкондан ижодий ишлар учун мўлжалланган бир қути патларни сотиб олган ва шикаст етган қанотга мос қилиб елимлаб қўйган.

Дастлаб капалак уча олмаган, аммо орадан бироз вақт ўтгач, кўплаб уринишлардан сўнг, Немо-Баки (аёл ҳашаротини шундай атаган) ҳавода режалаштиришни ўрганиб олган. Аёл капалакни боғга олиб чиққан ва у гуллар нектари билан мустақил озиқланган. Орадан вақт ўтгач у учиб кетган.

Далия капалак янги қаноти билан табиатда яшаб кета олмаслигидан хавотирланган, бироқ кейинроқ уни яна уйи атрофида учратиб қолган. Содир бўлган воқеа муносабати билан Далия билагига Немо-Бакининг татуировкасини чиздириб, «Ҳеч қачон таслим бўлма» деган ёзувни туширган.

Аввалроқ америкалик аёл товуғининг юрагини даволатиш учун 10 минг доллар сарфлагани тўғрисида хабар берилганди.