Франция президенти Эммануэль Макроннинг Лион кўргазмасига ташрифи чоғида унга тухум улоқтирган шахс мажбуран руҳий касалликлар клиникасига жойлаштирилди. Бу ҳақда маҳаллий прокуратурага асосланиб, BFM телеканали хабар берди.
«Лион прокуратурасининг илтимосига биноан ушбу шахс психиатрик текширувдан ўтказилди, натижада у касалхонага ётқизилиши керак, деган хулосага келинди», — дейилади назорат органида.
BFM маълумотларига кўра, у ҳозир Лион яқинидаги Брон коммунасининг Vinatier касалхонасида. Телеканал қайд этишича, ҳужумчи 19 ёшли талаба бўлиб чиққан. Воқеадан сўнг йигит ҳибсга олинган ва унга давлат ҳокимиятини эгаллаб турган шахсга қасддан зўравонлик қилиш моддаси бўйича айблов қўйилган. Бироқ руҳий текширувдан сўнг, ҳукумат уни мажбурий даволанишга юборишга қарор қилди.
27 сентябрь куни Макрон Лион шаҳридаги Eurexpo кўргазмасида умумий овқатланиш ва меҳмонхона бизнесини қўллаб-қувватлаш ҳақида нутқ сўзлаган. Шундан сўнг унга тухум улоқтиришган. Lyonmag нашри хабар беришича, ҳужумчи тухумни отишдан олдин «Яшасин инқилоб» деб бақирган. Тухум Макроннинг елкасига урилган, аммо синмаган. Кейинроқ воқеа жойидан олинган тасвирларда полда ётган тухум парчалари кўринади.
Аввалроқ 8 июнь куни Эммануэль Макронга фуқаролардан бири тарсаки туширган эди. Ҳодиса Франция жануби-шарқидаги Дром департаментининг Ten-L’Ermitaj коммунасида ўтказилган аҳоли билан учрашувда содир бўлган.
Кейинроқ Франция республика прокурори Макронга тарсаки туширган 28 ёшли Дамен Тарелга тўрт ойлик қамоқ жазоси берилганини маълум қилди.
Изоҳ (0)