Илон Маскнинг бойлиги 200 млрд доллардан ошди ва у яна дунёнинг энг бой одамига айланди

Forbes’нинг реал вақт режимида тузиладиган дунёнинг энг бой кишилари рейтингида Илон Маск биринчи ўринга кўтарилди.

Tesla акцияларининг қимматлашиши туфайли Маскнинг бойлиги 27 сентябрь куни 3,8 миллиард долларга ўсди ва бозор якунида 203,4 миллиардни ташкил этди.

Amazon асосчиси Жефф Безос иккинчи ўринга тушиб қолди, унинг бойлиги айни пайтда Forbes томонидан 197,7 миллиард долларга баҳоланмоқда. Учинчи ўринда Louis Vuitton Moet Hennessy раҳбари Бернард Арно турибди, унинг капитали 175,2 миллиард долларга тенг.

Forbes Real-Time рейтинги йирик компаниялар акцияларининг жорий қийматига қараб реал вақт режимида янгиланади. Шу сабабли, ундаги миллиардерларнинг ўрни доимий равишда алмашмоқда, чунки улар эгалик қиладиган компаниялар акцияларининг бир неча фоизга ошиши ёки тушиши уларнинг рейтингдаги мақомини бирданига миллиардлаб долларга автоматик равишда кўтаради ёки пасайтиради.

Маск Forbes Real-Time рейтингида бойлиги 200 миллиард доллардан ошган тарихдаги учинчи шахсга айланди (Безос ва Арнодан кейин). Маск, Безос ва Арно сўнгги бир неча ой ичида бу рейтингда бир неча бор биринчи ўринни эгаллаган.

Январь бошида ҳам Илон Маск Жефф Безосни ортда қолдириб дунёдаги энг бой бизнесменга айланганди. Кейинроқ иккинчи ўринга, май ойида эса Bloomberg Billionaires Index версиясига кўра, учинчи ўринга тушиб қолганди.