Россия Афғонистондаги вазият фонида АҚШга ёрдам сифатида унга терроризмга қарши курашиш учун Марказий Осиёдаги Россия базаларидан фойдаланишни таклиф қилган. Бу ҳақда Пентагон раҳбари Ллойд Остин Сенат тингловларида айтиб ўтди, деб ёзади Politico.
Унинг сўзларига кўра, Москва АҚШга Америка қўшинлари Афғонистондаги базаларини тарк этгач, террорчилик таҳдидларга жавоб қайтариш учун Осиёдаги Россия базаларидан фойдаланишни таклиф қилган. Остиннинг аниқлик киритишича, яқинда АҚШ штаб бошлиқлари қўмитаси раиси генерал Марк Милли бу таклифни россиялик ҳамкасби Валерий Герасимов билан муҳокама қилган.
«Генерал Милли яқинда россиялик ҳамкасби билан гаплашди. Менимча, у таклиф нима бўлганини тушунтириб беришни сўраган», — деди Пентагон раҳбари. Унинг аниқлик киритишича, бу масала биринчи марта Россия президенти Владимир Путин ва унинг америкалик ҳамкасби Жо Байден ўртасидаги учрашувда кўтарилган. Остин таъкидлашича, Путин ўшанда АҚШга кўмак беришни таклиф қилган. «Путин ёрдам кўрсатишни таклиф қилганди», — деди Пентагон раҳбари.
Остиннинг таъкидлашича, Пентагон Москвадан ҳеч нарса сўрамаган ва «Россиядан ҳеч қандай ҳаракат учун рухсат сўрамайди».
Аввалроқ The Wall Street Journal АҚШ Афғонистондаги вазиятни кузатиш учун Россиядан унинг Марказий Осиёдаги ҳарбий базаларидан фойдаланишни сўрагани ҳақида хабар берганди.
Россия президенти матбуот котиби Дмитрий Песков АҚШнинг бундай сўрови ҳақидаги хабарга изоҳ бермади.
«Мен бу мавзуга ҳеч қандай изоҳ бермайман», — деди Песков журналистларга. Унинг таъкидлашича, WSJ газетаси Россия ва АҚШ президентларининг Женевадаги музокараларига ишора қилмоқда. «Бу музокаралар ҳақида айтиш мумкин бўлган нарсаларнинг ҳаммаси айтиб бўлинган», — деди Песков.
Песков Женевадаги саммитда Россия президенти Владимир Путин америкалик ҳамкасби Жо Байденга ушбу минтақадаги ҳарбий базалардан фойдаланишни таклиф қилганми, деган саволга ҳам жавоб бермади. «Изоҳ бермайман», — деди Песков.
Изоҳ (0)