Никита Михалков: Ўзбекистон — Ўрта Осиё кино санъатининг ватани

«Ипак йўли дурдонаси» Тошкент халқаро кинофестивали кеча, 28 сентябрдан бошланди. Унга бир неча мамлакатлардан таниқли киноюлдузлар ташриф буюришди.

Улар кинофестиваль дастуридан ўрин олган тадбирларда иштирок этиб, жараён ҳақидаги фикрлари билан ўртоқлашишди.

Никита Михалков, россиялик актёр:

«Афсонавий фестиваль тиклангани жуда қувонарли ҳодиса. Ўрта Осиёда кино айнан шу заминда туғилган. Вақтида бу фестиваль ўз даврининг ноёб ва ўзгача фестивали эди. Ҳозир бу қадриятлар қайта тикланаётгани ўзбек киносига янги руҳият ва куч бағишлашига ишонаман».

Франко Неро, италиялик актёр:

«Кино эркинлик бор жойда ривожланади. Кино соҳасини кузатадиган бўлсак, бу борада ривожланган давлатлар ҳар томонлама анча ўзиб кетган. Мазкур кинофестиваль ҳам ўйлайманки, Ўзбекистон учун яхши ва янги марраларни олиб келади. Тошкент халқаро кинофестивалида қатнашаётганимдан хурсандман.

Ўйлаб қарасак, фестивални ўтказишдан мақсад ҳам дўстона алоқаларни ривожлантиришдир. Фестиваль давом этяпти. Киноижодкорларга омад тилайман».

Митҳун Чакраборти, ҳиндистонлик актёр:

«Бутун дунё бўйича инсонлар қалбида кино ҳиссиётлари бир хил бўлади. Мен ‘Ипак йўли дурдонаси’ Тошкент халқаро кинофестивали дастуридани «Кино 5 кунда» танловидаги фильмларни кўрдим ва бу картиналар ҳақида яхши фикрларга эга бўлдим. Шу вақтгача ёшларнинг ишларидан кўнглим тўлмасди. Лекин бугун ўзбек ёшларини кўрдим ва уларга қизиқишим ортди. Мен ўзбек фильмларини яна кўришга ва ижодий ҳамкорликда ишлашга тайёрман».

Эслатиб ўтамиз, Тошкент халқаро кинофестивали 3 октябргача давом этади.

Кинемотография агентлиги матбуот хизмати