Ўзбекистон Олий Мажлис Сенати кенгашининг 19-ялпи мажлиси бўлиб ўтмоқда. Мажлисда Сенат раиси Танзила Норбоева давлат бюджетининг 2021 йил биринчи ярим йиллик якунлари бўйича мулоҳазаларини билдирди, деб хабар беради парламент юқори палатаси матбуот хизмати.
Танзила Норбоеванинг таъкидлашича, маҳаллий бюджетларда шаклланган қўшимча манбалардан фойдаланишда қатор камчиликларга йўл қўйилмоқда.
«Ушбу маблағларни ишлатишда маҳаллий кенгашлар ҳал қилувчи вазифани бажаради. Бироқ улар бунга талаб даражасида қарамаяпти. Биргина Қашқадарё вилоятининг Ғузор, Миришкор, Касби, Чироқчи туманлари ва Қарши шаҳрида маҳаллий кенгашларда муҳокама қилинмасдан, депутатларнинг рухсатисиз 10 миллард сўмга яқин маблағ ишлатиб юборилган.
Умуман, бундай ҳолатларни бошқа ҳудудлар мисолида ҳам келтириш мумкин. Маҳаллий кенгашлар қонун билан ўзига берилган ваколатни чуқур англаб, амалда самарали фойдаланган ҳолда талабчанликни оширмас экан бу каби муаммолар камаймайди. Шу жиҳатдан, маҳаллий Кенгашлар вакиллари, айниқса, бюджет бўйича доимий комиссия аъзолари, шу жумладан, котибиятлар бу борада масъулиятни оширишлари лозим», — дейди Сенат раиси.
Эслатиб ўтамиз, Олий Мажлис Сенатининг ўн биринчи ялпи мажлисида Танзила Норбоева ҳокимларнинг сарфлаб бўлинган бюджет ҳисоботини тасдиққа олиб кириши нотўғрилиги ва бунга маҳаллий кенгашлар йўл қўймаслиги кераклигини таъкидлаб ўтган эди.
Изоҳ (0)