Гвинеяда сентябрь бошида давлат тўнтариши уюштириб ҳокимиятни қўлга киритган ва мамлакат президенти Алфа Кондени қўлга олган ҳарбийлар ўтиш даври хартиясини қабул қилди. Бу ҳақда тегишли ҳужжатга таяниб, «РБК» хабар берди.
Хартияга кўра, исёнчилар раҳбари Мамади Думбуя мамлакат президентига айланади. Ҳужжат, шунингдек, ҳукумат ҳамда 81 кишидан иборат Миллий ўтиш даври кенгаши тузилишини назарда тутади. Ҳукуматни фуқаролик бош вазири бошқаради, унга ва ҳукумат аъзоларига бўлажак сайловларда маҳаллий ва миллий даражада қатнашиш тақиқланади. Миллий ўтиш кенгашини президент ва икки вице-президент бошқаради, уларга ҳам сайловда қатнашиш тақиқланади. Бундан ташқари, кенгашдаги камида 30 фоиз ўринларни аёллар эгаллаши керак.
5 сентябрь куни бир гуруҳ ҳарбийлар Гвинеяда давлат тўнтариши уюштирганди. Қўзғолон раҳбари Мамади Думбуя ҳукуматни тарқатиб юбориб, чегаралар ёпилгани, мамлакат конституциясига амал қилиш тўхтатилгани ва Гвинея президенти Алфа Конде ҳибсга олингани ҳақида эълон қилди.
Думбуя давлат тўнтаришига сабаб сифатида Гвинеядаги ижтимоий-сиёсий ва иқтисодий вазиятнинг ёмонлигини келтирди. «Республика институтларининг, адолатни таъминлашнинг сустлиги, фуқаролар ҳуқуқларининг бузилиши, молиявий бошқарувнинг самарасизлиги республика армиясини Гвинея халқи олдида жавобгарликни ўзига олишга мажбур қилди», — таъкидлади исён етакчиси.
Бирлашган Миллатлар Ташкилоти Бош котиби Антониу Гутерриш ва Европа Иттифоқининг ташқи ишлар бўйича олий вакили Жосеп Боррел Африка мамлакатидаги тўнтаришни қоралаб, республика раҳбарини асирликдан озод қилишга чақирди.
Изоҳ (0)