Apple нима сабабдан Lightning қувватлантиргичларидан воз кечиб, USB-C’га ўтмоқчи эмаслигини тушунтирди

Еврокомиссия барча смартфон ва планшетларни ягона қувватлантириш разъёмига ўтказиш ниятида. Аммо Apple буни хоҳламаяпти. Компаниянинг ҳисоблашича, мажбурий равишда USB-C’га ўтиш — бу ёмон ғоя, деб хабар беради IXBT.

Таъкидланишича, янги қонун Европадаги харидорлар томонидан фойдаланиладиган миллионлаб фаол қурилма ва аксессуарларнинг ишини бузган ҳолда тўғридан-тўғри салбий таъсир кўрсатади. Шунингдек, бу Apple’нинг бутун дунёдаги мижозларига таъсир кўрсатиб, ортиқча электрон чиқиндиларни юзага келтиради.

Компаниядагиларнинг ҳисоблашича, USB-C’га ўтиш исрофгарчиликка олиб келади, чунки мижозлар янги кабеллар, адаптер ва аксессуарлар харид қилишга мажбур бўлади.

Шу билан бирга, Apple разъёмнинг ўзгариши оқибатида етказиладиган зарар моддий зарар ҳақида ҳеч нарса демаган, чунки компания МFi дастури доирасида Lightning разъёмларини лицензиялагани каби USB-C’ни лицензиялай олмайди.

2019 йилда Европа Комиссияси томонидан ўтказилган тадқиқотга кўра, ўша пайтда Европа Иттифоқи мамлакатларидаги гаджетларнинг ярмида миcроUSB улагичи, бошқа 29 фоизида USB-C, 21 фоизида эса Apple қурилмаларида фойдаланиладиган Lightning улагичи мавжуд бўлган.

2009 йилги тадқиқотларда эса бозорда 30 дан ортиқ турдаги зарядлаш қурилмалари аниқланган эди. Шу муносабат билан Apple, Samsung, Huawei ва Nokia компаниялари ишлаб чиқарувчиларга 2011 йилдан кейин чиқарилган телефонларда миcроUSB’дан фойдаланишни юкловчи меморандумни имзолаган. Бироқ, ҳужжат матни Apple’нинг Lightning’ни миcроUSB’га улайдиган мослама чиқариш билан чекланишига имкон берган.