Meizu 18S, 18S Prо флагманлари ва асосий эътибор дизайнига қаратилган 18Х смартфони тақдим этилди

Meizu компанияси Хитойдаги тақдимоти давомида учта янги моделини тақдим этди: иккитаси янгиланган флагман — Meizu 18S ва 18S Prо, шунингдек, асосий эътибор дизайнига қаратилган Meizu 18Х смартфони, деб хабар беради «Afisha.uz».

Meizu 18S ва 18S Prо

S қўшимчасига эга бўлган Meizu’нинг янгиланган флагманларида олдинги версияга нисбатан иккита жиҳат ўзгарган. Биринчиси — Snapdragon 888 ўрнига 18S ва 18S Pro’га Snapdragon 888+ процессори ўрнатилган. Иккинчиси — аппаратларнинг аккумулятор сиғими 5000 мА/соатга қадар оширилган.

Meizu 18S ва 18S Prо сентябрь охирига қадар Хитой ҳудудида сотувга чиқади. Расмий нархлар:

• Meizu 18S 8/12 Гб — 572 доллар;
• Meizu 18S 8/256 Гб — 618 доллар;
• Meizu 18S 12/256 Гб — 665 доллар;
• Meizu 18S Prо 8/128 Гб — 711 доллар;
• Meizu 18S Prо 8/256 Гб — 773 доллар;
• Meizu 18S Prо 12/256 Гб — 835 доллар.

Meizu 18Х

Meizu 18Х — флагманнинг асосий эътибор дизайнига қаратилган версияси. Смартфон дисплейи четида худди iPhone 13 услубидаги каби ингичка ҳошияга ва қора, оқ ёки кўк рангли шиша корпусга эга бўлади.

Янги модель Full HD+ сифатини қўллаб-қувватлайдиган ва 120 герцли янгиланиш частотасига эга 6,67 дюймли дисплейга эга бўлган. Бармоқ изи сканери экран остига жойлаштирилган. Аппарат Snapdragon 870 процессори, 8/12 гигабайт тезкор ва 128/256 гигабайт ички хотира ёрдамида ишлайди. Сиғими 4300 мА/соатли аккумулятор 30 ваттли тезкор қувватланиш функциясига эга.

Meizu 18Х’нинг тўртта камераси бор: 64 мегапикселли асосий, 8 мегапикселли кенг бурчакли, 2 мегапикселли макро-модуль ва 13 мегапикселли фронтал. Асосий модуль 8К форматдаги (кадрлари частотаси эълон қилинмаган), шунингдек, сониясига 30 та кадрда 4K сифатли, сониясига 60 ёки 30 та кадрда Full HD сифатли видеоларни тасвирга олишга қодир.

Meizu 18Х’нинг Хитойдаги расмий нархлари:

• 8/128 Гб — 402 доллар;
• 8/256 Гб — 433 доллар;
• 12/256 Гб — 464 доллар.

Аввалроқ Meizu ўзининг янги моделини iPhone смартфонларига устига қўшимча пул тўлаб, алмаштириш акциясини йўлга қўйганди. Ишлаб чиқарувчи янги Meizu 18 ва Meizu 18 Prо харидорлари ўз iPhone’ларини топширса, уларга жуда жозибадор чегирмаларни таклиф этмоқда.