Фуқаролик ишлари бўйича Тошкент шаҳар судининг апелляция инстанцияси биринчи инстанция судининг қарорини бекор қилиб, марҳум шарқшунос Андрей Кубатин оиласининг маънавий зарарни қоплаш тўғрисидаги даъвосини қисман қондирди. Бу ҳақда унинг синглиси Клара Сахаровага таяниб «Gazeta.uz» хабар берди.
17 май куни фуқаролик ишлари бўйича Учтепа туманлараро суди ҳам маънавий зарарни ундириш тўғрисидаги даъволарни қисман қаноатлантирган эди. Суд талаб қилинган 3,5 миллиард сўм ўрнига жавобгар — Тошкент ҳокимлиги Молия бош бошқармасига 30 миллион сўм тўлаш мажбуриятини юклади.
Марҳум олимнинг рафиқаси Феруза Жуманиёзованинг сўзларига кўра, суд унинг «шаъни, қадр-қиммати ва ишчанлик обрўсига путур етказадиган ҳақиқатга зид бўлган маълумотлар тарқалгани сабабли» олим сифатида фаол ижтимоий ҳаётини давом эттира олмагани, илмий асарлар ёзолмаган, ўғлини тўлиқ тарбиялаш билан шуғуллана олмаганини ҳисобга олмаган.
У, шунингдек, яшалган азоб-уқубатлар, тананинг умумий тонуси ва уйқу бузилиши, шунингдек, 2011 йилда туғилган фарзандларининг ҳуқуқлари бузилгани ҳақида ҳам маълум қилди.
Мавзуга доир: Марҳум турколог олим Андрей Кубатинга нисбатан тергов вақтида жисмоний ёки руҳий тазйиқ ўтказилмаган деб топилди
Унинг сўзларига кўра, Андрей Кубатинга ноқонуний судланганлик оқибатида етказилган бевосита моддий зарар миқдори 59 миллион сўм деб белгиланган.
«Эҳтимол, туманлараро фуқаролик суди маънавий зарар миқдори тўғридан-тўғри етказилган моддий зарар миқдорининг ярми сифатида белгиланиши керак, деган хулосага келгандир, аслида эса ноқонуний судланганлик натижасида етказилган маънавий зарар миқдори етказилган моддий зарар миқдоридан бир неча марта катта бўлиши керак», — дея таъкидлади у.
Адвокат Учтепа судининг нотўғри ва адолатсиз қарори Олий суд Пленумининг «Маънавий зарарни қоплаш тўғрисида»ги тавсияларига зид эканлигини таъкидлади.
«Суд А.Кубатин оиласи аъзолари бошидан кечирган азоб-уқубатлар, чекловлар, хушкўрилмасликларни ҳисобга олмади. Суд ўз яқини — Андрей Кубатиндан айрилганликнинг нақадар аччиқлигини инобатга олмади. Учтепа суди арзимаган 30 миллион сўмни тайинлашда на адолат туйғусига, на Олий суд Пленумининг тавсияларига амал қилган. У, эҳтимол, давлат бюджетига тушадиган юкни камайтириш мақсадида давлатнинг нотўғри тушуниладиган манфаатларини кўзлаган», — деди у.
Мавзуга доир: Бош прокуратура турколог олим Андрей Кубатиннинг ўлими бўйича жиноий иш очишни рад этди
У фуқаролик ишлари бўйича Учтепа туманлараро судининг қарорини ўзгартириб, оила аъзолари фойдасига 3,5 миллиард сўмлик маънавий зарарни ундириш тўғрисида қарор қабул қилишни сўради.
17 сентябрь куни фуқаролик ишлари бўйича Тошкент шаҳар суди апелляция инстанцияси судьяси Гузал Зиганшина раислигида ўтказилган суд коллегияси даъвони қисман қондириб, биринчи инстанция суди қарорини бекор қилди ва компенсация миқдорини 150 миллион сўмгача оширди. Тошкент шаҳар ҳокимлиги Молия бош бошқармаси мазкур суммани Андрей Кубатиннинг хотини ва ўғлига тўлаши керак.
Марҳум олимнинг синглиси ва онаси маънавий зарар учун компенсация олиш учун фуқаролик ишлари бўйича судга мурожаат қилишни режалаштирмоқда.
Клара Сахарованинг нашрга маълум қилишича, у «уйдирилган иш» доирасида укасини 15 суткалик ҳибсга олган ходимларга нисбатан жиноят ишини қўзғатишга эришиш мақсадида Тошкент шаҳар ИИБ бошлиғи Азиз Тошпўлатов ва ички ишлар вазири Пўлат Бобожонов билан учрашиш ниятида эканлигини айтди.
Изоҳ (0)